Mohanlal Prithviraj| മോഹൻലാൽ പൃഥ്വിരാജിന് സമ്മാനിച്ച പുത്തൻ സൺഗ്ലാസ്; വില എത്രയെന്ന് ആരാധകർ

ഖുറേഷി-അബ്രാം സംവിധായകന് നൽകിയ സമ്മാനം എന്താണെന്ന് കണ്ടിട്ടുണ്ടോ? മോഹൻലാലിന്റേയും പൃഥ്വിരാജിന്റേയും ആരാധകർ ആ സമ്മാനത്തിന്റെ വില അറിയാനുള്ള അന്വേഷണത്തിലാണ്.

ഇന്നലെയാണ് മോഹൻലാൽ നൽകിയ സമ്മാനം പൃഥ്വിരാജ് ഇൻസ്റ്റഗ്രാമിലൂടെ പങ്കുവെച്ചത്. രസകരമായ കുറിപ്പോടെയായിരുന്നു പൃഥ്വിരാജ് ചിത്രം പങ്കുവെച്ചത്.

പൃഥ്വിരാജ് സംവിധാനം ചെയ്ത ലൂസിഫറിലെ മോഹൻലാലിന്റെ കഥാപാത്രത്തിന്റെ പേരാണ് ഖുറേഷി അബ്രാം. ഖുറേഷി അബ്രാം തന്ന സമ്മാനം എന്നായിരുന്നു പൃഥ്വിരാജ് ചിത്രത്തിന് കുറിപ്പ് നൽകിയത്. വിലകൂടിയ സമ്മാനം നൽകിയതിന് മോഹൻലാലിന് നന്ദിയും താരം പറയുന്നുണ്ട്.

പ്രമുഖ ബ്രാൻഡായ ഡീറ്റയുടെ സൺഗ്ലാസാണ് ലാലേട്ടന്റെ സമ്മാനം. സെലിബ്രിറ്റികളുടെ ഇഷ്ട ബ്രാൻഡുകളിലൊന്നായ ഡീറ്റയുടെ സൺഗ്ലാസുകളിൽ പലതിനും ലക്ഷങ്ങളാണ് വില. അതിനാൽ തന്നെ മോഹൻലാൽ നൽകിയ സൺഗ്ലാസിന്റെ വില അന്വേഷിക്കുകയാണ് ആരാധകർ.

പൃഥ്വിരാജ് പങ്കുവെച്ച ചിത്രത്തിന് താഴെ വന്നുകൊണ്ടിരിക്കുന്ന കമന്റുകളും രസകരമാണ്. ഇതിനകം ബ്രാൻഡിന്റെ ഓൺലൈൻ സ്റ്റോറിലും മറ്റും വില അന്വേഷിച്ച് ആരാധകർ എത്തിയിട്ടുണ്ട്. പല വിലകളാണ് കമന്റുകളിൽ നിറയുന്നത്. രസകരമായ സംഭാഷണങ്ങളും കമന്റ് ബോക്സിൽ നടക്കുന്നു.

മോഹൻലാലിനെ നായകനാക്കി പൃഥ്വി ഒരുക്കുന്ന ബ്രോ ഡാഡിയുടെ ചിത്രീകരണം ഹൈദരാബാദിൽ പൂർത്തിയായി. ഇതിനിടയിലാണ് ലാലേട്ടന്റെ വക പൃഥ്വിക്ക് അപ്രതീക്ഷിത സമ്മാനം ലഭിച്ചത്. പൃഥ്വിരാജ് സംവിധാനം ചെയ്യുന്ന രണ്ടാമത്തെ ചിത്രമാണ് ബ്രോ ഡാഡി.

മോഹൻലാലിന് പുറമേ പൃഥ്വിരാജ്, മീന, കല്യാണി പ്രിയദർശൻ, ഉണ്ണി മുകുന്ദൻ, ലാലു അലക്സ്, മുരളി ഗോപി, കനിഹ, മല്ലിക സുകുമാരൻ, സൗബിൻ ഷാഹിർ എന്നിവരാണ് ബ്രോ ഡാഡിയിലെ മറ്റ് താരങ്ങൾ.