AR Rahman Saira Banu: 'ഞാനെന്റെ ജീവനോളം സ്നേഹിക്കുന്നു'; റഹ്മാൻ ലോകത്തിലെ ഏറ്റവും മികച്ച മനുഷ്യനെന്ന് ‍സൈറ ബാനു

എ ആർ റഹ്മാനെ(AR Rahman) താൻ ജീവനോളം സ്നേഹിക്കുന്നുവെന്നും വിശ്വസിക്കുന്നുവെന്നും ഭാര്യ സൈറാ ബാനു(Saira Banu). ലോകത്തിലെ ഏറ്റവും മികച്ച മനുഷ്യനാണ് റഹ്മാൻ എന്നും അദ്ദേഹത്തിന്റെ പേരിലുകൾക്ക് കളങ്കം വരുത്തുന്ന തരത്തിലുള്ള പ്രചാരണങ്ങൾ അവസാനിപ്പിക്കണമെന്നും സൈറ ബാനു.

സൈറാബാനുമായുള്ള 29 വർഷം നീണ്ട വിവാഹജീവിതം അവസാനിപ്പിക്കുന്നുവെന്ന് പ്രഖ്യാപിച്ചതിന് പിന്നാലെ സംഗീതസംവിധായകൻ എ ആർ റഹ്മാനെ ആക്ഷേപിക്കുന്ന തരത്തിൽ പല വിവാദങ്ങളും ഉയർന്നിരുന്നു. ഇതിനെതിരെയാണ് സൈറാബാനു ഇപ്പോൾ രംഗത്തെത്തിയിരിക്കുന്നത്.

താനിപ്പോൾ ബോംബെയിലാണ് താമസിക്കുന്നതെന്നും എആറിൽ നിന്നും ഒരു ബ്രേക്ക് എടുക്കാൻ വേണ്ടി കഴിഞ്ഞ കുറച്ചു മാസമായി താൻ ഇവിടെയാണെന്നും സൈറ കൂട്ടിച്ചേർത്തു. തന്റെ ആരോഗ്യപ്രശ്നം കാരണമാണ് തനിക്ക് ചെന്നൈയിൽ നിൽക്കാൻ സാധിക്കാത്. താൻ ചെന്നൈയിൽ ഇല്ലെങ്കിൽ സൈറ എവിടെയാണ് എന്ന് ആളുകൾ അന്വേഷിക്കും എന്ന് തനിക്കറിയാം.

താനിപ്പോൾ ചികിത്സയിലാണ്. തിരക്കിനിടയിൽ എ ആറിന് ചെന്നൈയിൽ ഇത് സാധ്യമല്ല. എ ആർ റഹ്മാൻ എങ്ങനെയാണോ അങ്ങനെ തന്നെ തുടരാൻ അനുവദിക്കണമെന്നും അത്രത്തോളം അദ്ദേഹത്തെ സ്നേഹിക്കുന്നുവെന്നും സൈറ വ്യക്തമാക്കി. അതേസമയം തന്റെ വിവാഹമോചന വാർത്തയുമായി ബന്ധപ്പെടുത്തി അപവാദപ്രചരണം നടത്തിയവർക്കെതിരെ നിയമനടപടിയുമായി സം​ഗീത സംവിധായകൻ എ.ആർ. റഹ്മാൻ(A R Rahman).

വിദ്വേഷം പരത്തുന്ന വിധത്തിൽ ഉള്ളടക്കമുള്ള എല്ലാം തന്നെ ഉടൻ നീക്കം ചെയ്യണമെന്നാണ് എ ആർ റഹ്മാന്റെ മുന്നറിയിപ്പ്. വക്കീൽ നോട്ടീസിലൂടെയാണ് അദ്ദേഹം ഇക്കാര്യം അറിയിച്ചത്.റഹ്മാനുവേണ്ടി നർമദാ സമ്പത്ത് അസോസിയേറ്റ്സ് ആൻഡ് അഡ്വൊക്കേറ്റ്സ് ആണ് വക്കീൽ നോട്ടീസ് അയച്ചിരിക്കുന്നത്.

ഭാര്യ സൈറാബാനു(Saira banu)വുമൊത്ത് സംയുക്ത പ്രസ്താവനയായാണ് അദ്ദേഹം ഇക്കാര്യം വ്യക്തമാക്കിയിരിക്കുന്നത്.ഒരു മണിക്കൂർ അല്ലെങ്കിൽ പരമാവധി 24 മണിക്കൂറിനുള്ളിൽ തന്റെ പ്രശസ്തിയെയും കുടുംബത്തേയും ബാധിക്കുന്ന തരത്തിലുള്ള എല്ലാ പോസ്റ്റുകളും നീക്കം ചെയ്യണമെന്നാണ് റഹ്മാന്റെ മുന്നറിയിപ്പ്.