'ഞങ്ങളുടെ ബേബി ​ഗേൾ ഇങ്ങെത്തി';കുഞ്ഞ് പിറന്ന സന്തോഷം പങ്കുവച്ച് വരുൺ ധവാൻ

ബോളിവുഡ് നടൻ വരുൺ ധവാനും ഭാര്യ നടാഷ ദലാലിനും കുഞ്ഞ് പിറന്നു. വരുണിന്റെ പിതാവും സംവിധായകനുമായ ഡേവിഡ് ധവാന്‍ ആണ് ഈ വിവരം അറിയിച്ചത്. തന്റെ സന്തോഷം പങ്കുവച്ച് സോഷ്യല്‍ മീഡിയയില്‍ വരുണ്‍ ധവാന്‍ പോസ്റ്റ് പങ്കുവച്ചിട്ടുണ്ട്.

 'ഞങ്ങളുടെ ബേബി ​ഗേൾ ഇങ്ങെത്തി, കുഞ്ഞിനും അമ്മയ്ക്കും ആശംസകൾ അറിയിച്ച എല്ലാവർക്കും നന്ദി'യെന്നാണ് വരുൺ ഇൻസ്റ്റ​ഗ്രാമിൽ കുറിച്ചത്.

ഇതോടെ നിരവധി താരങ്ങളാണ് താരദമ്പതികൾക്ക് ആശംസകൾ അറിയിച്ച് രംഗത്ത് എത്തിയത്. കരീന കപൂർ, കരൺ ജോ​ഹർ, പ്രിയങ്ക ചോപ്ര തുടങ്ങി ബോളിവുഡിലെ നിരവധി പ്രമുഖരാണ് വരുണിനും നടാഷയ്ക്കും ആശംസകൾ അറിയിച്ചിരിക്കുന്നത്.

 അമ്മയ്ക്കും കുഞ്ഞിനും ആശംസകളെന്ന് ആരാധകരും കുറിച്ചു . ഫെബ്രുവരിയിലാണ് തങ്ങൾ കുഞ്ഞതിഥിയെ വരവേൽക്കാനൊരുങ്ങുകയാണെന്ന സന്തോഷം വരുണും നടാഷയും ആരാധകരെ അറിയിച്ചത്.

ഇതിനിടെ വരുണ്‍ മുമ്പൊരിക്കല്‍ പെണ്‍കുഞ്ഞിന്റെ അച്ഛനാകണം എന്ന് പറഞ്ഞ വാക്കുകളാണ് ചര്‍ച്ചയാകുന്നത്. കരണ്‍ ജോഹറുടെ കോഫി വിത്ത് കരണ്‍ ഷോയില്‍ ആയിരുന്നു വരുണ്‍ സംസാരിച്ചത്.

”വിവാഹത്തില്‍ ഞാന്‍ വിശ്വസിക്കുന്നുണ്ട്. എന്റെ മാതാപിതാക്കള്‍ വളരെ ഉറച്ച ദാമ്പത്യബന്ധം പുലര്‍ത്തുന്നവരാണ്. എനിക്കും വിവാഹം ചെയ്യണം. എനിക്ക് കുഞ്ഞുങ്ങള്‍ വേണം. എനിക്കൊരു പെണ്‍കുഞ്ഞ് വേണം. കുഞ്ഞുങ്ങളെ എനിക്ക് ഇഷ്ടമാണ്, അതുകൊണ്ട് എനിക്കും വേണം” എന്നായിരുന്നു വരുണ്‍ പറഞ്ഞത്.

2021 ജനുവരിയിലാണ് വരുണും നടാഷയും വിവാ​ഹിതരായത്. അടുത്ത ബന്ധുക്കളും സുഹൃത്തുക്കളും മാത്രമാണ് വിവാ​ഹത്തിൽ പങ്കെടുത്തത്. അതേസമയം നിരവധി സിനിമകളാണ് വരുണിന്റേതായി ലൈൻ അപ്പിലുള്ളത്. എ കാളീശ്വരൻ സംവിധാനം ചെയ്യുന്ന ബേബി ജോൺ ആണ് വരുണിന്റേതായി ഇനി പുറത്തുവരാനുള്ള ചിത്രം.