രമണനും ദാമുവിനും അൽപ്പം വിശ്രമിക്കാം; ട്രോൾ ലോകം ഇനി വാസു അണ്ണൻ ഭരിക്കും

രമണനും ദാമുവിനും ശേഷം മലയാളം ട്രോൾ ലോകത്ത് പുതിയൊരു അവതാരം കൂടി, വാസു അണ്ണൻ.

വാസു അണ്ണനാണ് സോഷ്യൽമീഡിയയിൽ കുറച്ചു ദിവസമായി വൈറലായി ഓടിക്കൊണ്ടിരിക്കുന്നത്. വില്ലന്മാരെയെല്ലാം പിടിച്ച് കോമഡിയാക്കുന്ന പ്രത്യേക പ്രതിഭാസമാണ് ട്രോൾ ലോകത്ത് നടക്കുന്നത്.

ദിലീപ് നായകനായ കുഞ്ഞിക്കൂനൻ എന്ന ചിത്രത്തിലെ സായ് കുമാർ അവതരിപ്പിച്ച വില്ലൻ കഥാപാത്രമാണ് വാസു.

ട്രോളൻമാർ ഏറ്റെടുത്തതോടെ രമണനേയും ദാമുവിനേയും പോലെ സിനിമ ഇറങ്ങി വർഷങ്ങൾക്ക് ശേഷം ഹിറ്റായ കഥാപാത്രമായി വാസു അണ്ണനും മാറി.

സോഷ്യൽമീഡിയയിൽ എവിടെ നോക്കിയാലും വാസു അണ്ണൻ മീമുകളാണ്. രമണനും ദാമുവിനും ഇനി അൽപ്പം വിശ്രമിക്കാം, ട്രോൾ ലോകത്ത് വാസു അണ്ണൻ അവതാരപ്പിറവി എടുത്തെന്നാണ് ട്രോളന്മാർ പറയുന്നത്.

സിനിമ പുറത്തിറങ്ങി പതിനെട്ടു വർഷങ്ങൾക്ക് ശേഷമാണ് വാസു അണ്ണനെന്ന റൊമാന്റിക് ഹീറോയെ ട്രോൾ ലോകം കണ്ടെത്തുന്നത്.

സിനിമയിലെ നായികയായ മന്യയുടേയും വാസു അണ്ണന്റേയും മീമുകളും സൂപ്പർ ഹിറ്റാണ്.

സംഗതി വൈറലായതോടെ മന്യ തന്നെ കഴിഞ്ഞ ദിവസം വാസു അണ്ണനെ ട്രോളി പോസ്റ്റും ഇട്ടിരുന്നു. വാസു അണ്ണനല്ല, വികാസ് ആണ് തന്റെ ശരിക്കുള്ള ഭർത്താവ് എന്നായിരുന്നു മന്യയുടെ പോസ്റ്റ്. ട്രോളൻമാർ ആ പോസ്റ്റും വെറുതേ വിട്ടില്ല.

സിനിമയിൽ ചോരക്കണ്ണുള്ള ക്രൂരനായ വില്ലനായിരുന്നെങ്കിലും വാസു അണ്ണന്റെ നന്മയെ കുറിച്ചാണ് പല ട്രോളുകളും.

വില്ലനായിരുന്നെങ്കിലും വാസു സത്യസന്ധനും പ്രണയ നായകനുമായിരുന്നു എന്നൊക്കെയാണ് വാട്സ് ആപ്പിലും ഇൻസ്റ്റഗ്രാമിലമൊക്കെ പ്രചരിക്കുന്നത്.

ജാതിക്കാ തോട്ടം എന്ന പാട്ടും പാടി നടക്കുന്ന റൊമാന്റ് ഹീറോ വാസു അണ്ണനെ കണ്ട് അന്തംവിട്ടിരിക്കുകയാണ് പലരും.