Covid 19 | സജീവ കോവിഡ് കേസുകളിൽ മൂന്നാമതെത്തി കേരളം; രാജ്യത്തെ കോവിഡ് രോഗികൾ 63 ലക്ഷം കടന്നു

ന്യൂഡൽഹി: സജീവ കോവിഡ് കേസുകളിൽ രാജ്യത്ത് മൂന്നാമതെത്തി കേരളം. 67,061 പേരാണ് കോവിഡ് ബാധിച്ച് നിലവിൽ സംസ്ഥാനത്ത് ചികിത്സയിലുള്ളത്. കുറച്ച് ദിവസങ്ങളായി കേരളത്തിൽ രോഗബാധിതരുടെ എണ്ണം വർദ്ധിച്ചു വരികയാണ്. കഴിഞ്ഞ ദിവസം ആദ്യമായി പ്രതിദിന കണക്ക് എണ്ണായിരം കടന്നു.

8830 പേർക്കാണ് കഴിഞ്ഞ ദിവസം രോഗം സ്ഥിരീകരിച്ചത്. ഇതിൽ 7695 കേസുകളും സമ്പർക്കത്തിലൂടെ രോഗബാധിതരായവരാണ്. രോഗമുക്തി നിരക്കിൽ ഇന്ത്യൻ സംസ്ഥാനങ്ങളിൽ ഏറ്റവും പിന്നിലാണ് കേരളം. 65.4% ആണ് ഇവിടുത്തെ രോഗമുക്തി നിരക്ക്. 1,28,224 പേരാണ് ഇതുവരെ രോഗമുക്തി നേടിയിട്ടുള്ളത്.

അതേസമയം മരണനിരക്ക് ഏറ്റവും കുറഞ്ഞ് (0.04%) നിൽക്കുന്നു എന്നതാണ് ആശ്വാസം പകരുന്നത്. ഇതുവരെ 742 കോവിഡ് മരണങ്ങളാണ് കേരളത്തിൽ റിപ്പോർട്ട് ചെയ്യപ്പെട്ടത്.

സജീവ രോഗികളുടെ കണക്കിൽ മഹാരാഷ്ട്രയും കർണ്ണാടകയുമാണ് കേരളത്തിന് മുന്നിലുള്ളത്. മഹാരാഷ്ട്രയില്‍ 2,60,363 പേരും കര്‍ണാടകയില്‍ 1,07,737 പേരും ചികിത്സയില്‍ തുടരുകയാണ്. 

കോവിഡ് വ്യാപനം ഏറ്റവും രൂക്ഷമായ സംസ്ഥാനങ്ങളിലൊന്നായ മഹാരാഷ്ട്രയിൽ ഇതുവരെ 13.66 ലക്ഷത്തിലധികം കേസുകളാണ് സ്ഥിരീകരിച്ചത്. ഇരുപത്തി രണ്ട് സംസ്ഥാനങ്ങളിൽ സജീവ കേസുകളുടെ എണ്ണത്തിൽ കുറവ് രേഖപ്പെടുത്തിയിട്ടുണ്ട്.

അതേസമയം രാജ്യത്തെ ആകെ കോവിഡ് ബാധിതർ അറുപത്തിമൂന്ന് ലക്ഷം കടന്നിരിക്കുകയാണ്. കഴിഞ്ഞ 24 മണിക്കൂറിനിടെ 86,821 പേര്‍ക്ക് കൂടി രോഗം സ്ഥിരീകരിച്ചതോടെ ആകെ രോഗബാധിതരുടെ എണ്ണം 63,12,585 ആയി ഉയർന്നു. ആരോഗ്യ-കുടുംബക്ഷേമ മന്ത്രാലയത്തിന്‍റെ കണക്കുകൾ അനുസരിച്ച് 52,73,202 പേർ രോഗമുക്തി നേടിയിട്ടുണ്ട്. 9,40,705 പേരാണ് നിലവിൽ ചികിത്സയിൽ തുടരുന്നത്. 

ഒറ്റദിവസത്തിനിടെ റിപ്പോർട്ട് ചെയ്യപ്പെട്ട 1,181 മരണങ്ങൾ ഉൾപ്പെടെ 98,678 കോവിഡ് മരണങ്ങളാണ് രാജ്യത്ത് ഇതുവരെ റിപ്പോർട്ട് ചെയ്യപ്പെട്ടിട്ടുള്ളത്.

കോവിഡ് പരിശോധനകളുടെ എണ്ണം വർധിപ്പിച്ചതാണ് കോവിഡ് കണക്കിൽ കുത്തനെ വർധനവ് ഉണ്ടാക്കിയിരിക്കുന്നത്. സെപ്റ്റംബറില്‍ മാത്രം ഇതുവരെ 3.13 കോടി പേരിൽ പരിശോധന നടത്തിയിട്ടുണ്ടെന്നാണ് കണക്കുകൾ.

കഴിഞ്ഞ ദിവസം മാത്രം 14.23ലക്ഷം പേരിലാണ് പരിശോധന നടത്തിയത്. ഇതുവരെയുള്ളതിൽ വച്ചേറ്റവും ഉയർന്ന രണ്ടാമത്തെ കണക്കാണിത്. ഇതുവരെ 7.56 കോടി ആളുകളിൽ കോവിഡ് പരിശോധന നടത്തിയിട്ടുണ്ടെന്നാണ് ഇന്ത്യൻ കൗൺസിൽ ഓഫ് മെഡിക്കൽ റിസർച്ചിന്‍റെ റിപ്പോർട്ട്.

കോവിഡ് വ്യാപനം- ആഗോള തലത്തിലുള്ള കണക്കുകൾ

കോവിഡ് വ്യാപനം- ദേശീയ തലത്തിലുള്ള കണക്കുകൾ