COVID 19 | മാസ്ക് ധരിക്കാൻ ആവശ്യപ്പെട്ട പൊലീസ് കോൺസ്റ്റബിളിനെ ജനക്കൂട്ടം മർദ്ദിച്ചു

അസം: രാജ്യത്ത് കോവിഡ് മഹാമാരി കൂടുതൽ പേരിലേക്ക് വ്യാപിക്കുകയാണ്. മാസ്ക് ധരിക്കുക, സാമൂഹ്യ അകലം പാലിക്കുക, കൈ കഴുകുക തുടങ്ങിയ കാര്യങ്ങൾ പിന്തുടരാൻ ആരോഗ്യപ്രവർത്തകരും പൊലീസും ഭരണകൂടവും നിരന്തരം നിർദ്ദേശിക്കുകയാണ്.

ഇതിനിടയിലാണ് അസമിൽ നിന്നുള്ള ഒരു വാർത്ത മനസാക്ഷിയെ ഉലയ്ക്കുന്നത്. മാസ്ക് ധരിക്കാൻ ആവശ്യപ്പെട്ട പൊലീസ് കോൺസ്റ്റബിളിനെ ജനക്കൂട്ടം മർദ്ദിച്ചു.

അസമിലെ നാഗോൺ പട്ടണത്തിൽ ഞായറാഴ്ചയാണ് സംഭവം. മാസ്ക് ധരിക്കാനും സാമൂഹ്യ അകലം പാലിക്കാനും ആവശ്യപ്പെട്ട പൊലീസ് കോൺസ്റ്റബിളിനെ ജനക്കൂട്ടം മർദ്ദിക്കുകയായിരുന്നു.

ജനക്കൂട്ടത്തിന്റെ ആക്രമണത്തിൽ പൊലീസ് കോൺസ്റ്റബിൾ രത്തൻ മുക്തിയാരുടെ മുഖത്തിനും ഇടത് കണ്ണിനും പരിക്കേറ്റു. സംഭവത്തെ തുടർന്ന് കോൺസ്റ്റബിൾ നാഗോൺ സദർ പൊലീസ് സ്റ്റേഷനിൽ എഫ് ഐ ആർ രജിസ്റ്റർ ചെയ്തു.

സംസ്ഥാനത്ത് കോവിഡ് 19 പോസിറ്റീവ് കേസുകൾ വർദ്ധിച്ചു കൊണ്ടിരിക്കുന്ന സാഹചര്യത്തിലാണ് മാസ്ക് ധരിക്കാൻ പൊലീസ് കോൺസ്റ്റബിൾ ആളുകളോട് ആവശ്യപ്പെട്ടത്. എന്നാൽ, ഇതിനെ പിന്നാലെ ജനക്കൂട്ടം തന്നെ ആക്രമിക്കുകയായിരുന്നെന്ന് രത്തൻ മുക്തിയാർ പറഞ്ഞു.

മുഖത്ത് മാസ്ക് ധരിക്കണമെന്ന് ആവശ്യപ്പെടുന്നത് തെറ്റാണോയെന്നും അതിന്റെ പേരിൽ തന്നെ ചിലർ ആക്രമിച്ചതായും പൊലീസ് കോൺസ്റ്റബിൾ മുക്തിയാർ പറഞ്ഞു.

ഇതിനിടെ, പൊലീസ് കോൺസ്റ്റബിളിനെ ആക്രമിച്ച സംഭവത്തിൽ പങ്കുണ്ടെന്ന് ആരോപിച്ച് നാഗോൺ ജില്ല പൊലീസ് ഒരു യുവാവിനെ പിടികൂടി.