കാണാൻ വന്നത് മറ്റൊരു കാര്യത്തിന്; പക്ഷെ ആനി ബാലചന്ദ്ര മേനോന്റെ സിനിമയിൽ നായികയായി

1993ൽ പുറത്തിറങ്ങിയ 'അമ്മയാണേ സത്യം' എന്ന ബാലചന്ദ്ര മേനോൻ ചിത്രം മലയാള സിനിമയ്ക്കു ഒരു പുതിയ അഭിനേത്രിയെക്കൂടി സമ്മാനിക്കുകയായിരുന്നു; ആനി. വിദ്യാർത്ഥിനിയായിരുന്ന ആനി ആൺവേഷത്തിലും പെൺവേഷത്തിലും പാർവതിയായും, രാമനായും  ഈ സിനിമയിൽ വേഷമിട്ടു

മലയാള സിനിമയിൽ അക്കാലത്തു വളരെയേറെ നടിമാരെ അവതരിപ്പിച്ചതിനുള്ള ക്രെഡിറ്റും ബാലചന്ദ്ര മേനോനാണ്. ശോഭന, കാർത്തിക, പാർവതി, ലിസി, നന്ദിനി, ഉഷ, മീര തുടങ്ങിയവർ ബാലചന്ദ്ര മേനോൻ സിനിമകളിലൂടെ വെള്ളിത്തിരയിലെത്തിയവരാണ്

ബാലചന്ദ്ര മേനോന്റെ യൂട്യൂബ് ചാനലിലെ വെള്ളിയാഴ്ച പരിപാടിയായ 'ഫിൽമി ഫ്രൈഡേയ്സിലാണ്' ആനിയുടെ തീർത്തും അവിചാരിതമായ സിനിമാ പ്രവേശത്തെപ്പറ്റി അദ്ദേഹം പറയുന്നത്

അഭിനയിക്കാൻ വേണ്ടിയല്ല ആനി അദ്ദേഹത്തെ കാണാൻ വരുന്നത്. ബാലചന്ദ്ര മേനോനെ വെറുതെ ഇന്റർവ്യൂ ചെയ്യാൻ വന്ന പെൺകുട്ടിയാണ് 'അമ്മയാണേ സത്യത്തിൽ' നായികയായി മാറിയത്. അതിനു പിന്നിൽ ഒരു കഥയുണ്ടെന്നും അദ്ദേഹം പറയുന്നു

വരും എപ്പിസോഡുകളിൽ തന്റെ സിനിമാ അനുഭവങ്ങൾ പറയും എന്ന് പറഞ്ഞ ബാലചന്ദ്ര മേനോൻ ഒരുപക്ഷെ ആ കഥയും ഒളിപ്പിച്ചു വച്ചിട്ടുണ്ടാകാം. കേവലം മൂന്നു വർഷത്തെ അഭിനയ ജീവിതവും ചുരുക്കം ചില ചിത്രങ്ങളുമാണ് ആനിയുടേതായി ഉള്ളതെങ്കിലും മലയാളി പ്രേക്ഷകർ എക്കലവും സ്നേഹിക്കുന്ന നടിമാരിൽ ഒരാളുടെ സ്ഥാനം  ആനിക്കുണ്ട്

1996ൽ ഷാജി കൈലാസുമായുള്ള പ്രണയ വിവാഹത്തിന് ശേഷം ആനി സിനിമയിൽ നിന്നും പിൻവാങ്ങി. വർഷങ്ങൾക്ക് ശേഷം മിനിസ്ക്രീനിലെ കുക്കറി ഷോയിലൂടെയാണ് ആനിയുടെ മടങ്ങിവരവ്