Alia Bhatt: നൂറുകോടി ക്ലബ്ബിലെ 'റാണി'; ഈ നേട്ടം കൈവരിച്ച ആലിയ ഭട്ടിന്റെ എട്ട് സിനിമകൾ

കരൺ ജോഹറിന്റെ റൊമാന്റിക് കോമഡി ചിത്രമായ 'റോക്കി ഔർ റാണി കി പ്രേം കഹാനി' നൂറുകോടി ക്ലബിൽ ഇടംനേടി. ഈ നേട്ടം സ്വന്തമാക്കുന്ന ആലിയ ഭട്ടിന്റെ എട്ടാമത്തെ ചിത്രമാണിത്. ഇതോടെ 'നൂറുകോടി ക്ലബിന്റെ റാണി' എന്ന വിശേഷണവും ആലിയ സ്വന്തമാക്കി. ആലിയയുടെ നൂറു കോടി കളക്ഷൻ നേടിയ മറ്റ് ചിത്രങ്ങൾ ഏതെന്ന് നോക്കാം

<strong>2 സ്റ്റേറ്റ്സ്-</strong> അഭിഷേക് വർമന്റെ സംവിധായകനെന്ന നിലയിലെ അരങ്ങേറ്റ ചിത്രം. ഐഐഎം അഹമ്മദാബാദിലെ തമിഴ് വിദ്യാർത്ഥിനിയായ അനന്യ എന്ന കഥാപാത്രത്തെയാണ് ആലിയ സിനിമയിൽ അവതരിപ്പിച്ചത്. പഞ്ചാബിയായ ക്ലാസ്മേറ്റ് കൃഷ് (അർജുൻ കപൂർ) എന്ന കഥാപാത്രവുമായി അനന്യ പ്രണയത്തിലാകുന്നതാണ് ചിത്രം. 2014ല്‍ പുറത്തിറങ്ങിയ ചിത്രം രാജ്യത്തിനകത്ത് നിന്ന് മാത്രം 102.13 കോടി രൂപയുടെ കളക്ഷൻ നേടി.

<strong>ബദരിനാഥ് കി ദുൽഹനിയ-</strong> 2 സ്റ്റേറ്റ്സ് ഇറങ്ങി മൂന്ന് വർഷം കഴിഞ്ഞ് 2017ലാണ് ശശാങ്ക് ഖൈതാന്റെ റൊമാന്റിക് കോമഡി ചിത്രമാണ് ബദരിനാഥ് കി ദുൽഹനിയ പുറത്തിറങ്ങിയത്. ആലിയയുടെ തന്നെ 2014ൽ പുറത്തിറങ്ങിയ ഹംപ്റ്റി ശർമ കി ദുൽഹനിയ എന്ന സിനിമയുടെ സ്വീക്വൽ ആയിരുന്നു ഇത്. വരുണ്‍ ധവാനും ആലിയയും അഭിനയിച്ച ചിത്രം 116.68 കോടി രൂപയാണ് നേടിയത്. ആദ്യഭാഗത്തിന്റെ ബോക്സ് ഓഫീസ് കളക്ഷൻ 76.81 കോടിയായിരുന്നു.

<strong>റാസി-</strong> മേഘ്ന ഗുൽസാറിന്റെ 2018ൽ പുറത്തിറങ്ങിയ സ്പൈ ത്രില്ലർ ചിത്രം റാസി, ആലിയ എന്ന നടിയുടെ കരുത്തിൽ നൂറുകോടി കളക്ഷനിലേക്ക് കുതിക്കുകയായിരുന്നു. വിക്കി കൗശൽ ആയിരുന്നു നായക കഥാപാത്രം. എന്നാൽ ആ സമയത്ത് വിക്കി ബോക്സ് ഓഫീസിൽ അത്ര ഗാരന്റിയുള്ള താരമായിരുന്നില്ല. പാക് സൈനിക ജനറലിന്റെ കുടുംബത്തിലെത്തുന്ന സെഹ്മത്ത് എന്ന കശ്മീരി ചാര വനിതയുടെ വേഷത്തിൽ ആലിയ തിളങ്ങി. രാജ്യത്തിനകത്തുനിന്ന് മാത്രം 123.84 കോടി രൂപയാണ് കളക്ഷൻ നേടിയത്.

<strong> ഗല്ലി ബോയ്-</strong> സോയ അക്തറിന്റെ ഗല്ലി ബോയി ആയിരുന്നു ആലിയയുടെ നൂറുകോടി ക്ലബിൽ ഇടംനേടിയ അടുത്ത ചിത്രം. രൺവീർ സിങ്ങ് അവതരിപ്പിച്ച മുറാദ് എന്ന കഥാപാത്രത്തിന്റെ ദേഷ്യക്കാരിയായ സഫീന എന്ന കാമുകിയായാണ് ആലിയ ചിത്രത്തിലെത്തിയത്. 140.25 കോടി രൂപയാണ് ചിത്രത്തിന്റെ ബോക്സ് ഓഫീസ് കളക്ഷൻ.

<strong>ഗംഗുബായി കത്തിയാവാഡി-</strong> 2022 വർഷം ബോളിവുഡിനെ സംബന്ധിച്ച് ആലിയ ഭട്ടിന്റേതായിരുന്നു. സഞ്ജയ് ലീലാ ബൻസാലി സംവിധാനം ചെയ്ത സിനിമ 129.10 കോടി രൂപയാണ് വാരിക്കൂട്ടിയത്. 1950-60 കാലഘട്ടത്തിലെ മുംബൈയിലെ ലൈംഗികത്തൊഴിലാളിയായ ടൈറ്റിൽ കഥാപാത്രത്തെയാണ് താരം അവതരിപ്പിച്ചത്.

<strong>ആർആർആര്‍-</strong> ഓസ്കറിൽ തിളങ്ങുക മാത്രമല്ല, കഴിഞ്ഞ വർഷം ബോക്സ് ഓഫീസിലും തരംഗം തീർത്ത ചിത്രമായിരുന്നു രാജമൗലിയുടെ ആർആർആർ. രാംചരണിനും ജൂനിയർ എൻടിആറിനും ഒപ്പം ആലിയ അഭിനയിച്ച തെലുങ്ക് ചിത്രം ബോക്സ് ഓഫീസിൽ 274.31 കോടി രൂപയാണ് നേടിയത്. മികച്ച ഒറിജിനൽ സോങ്ങിനുള്ള ഓസ്കർ പുരസ്കാരം ചിത്രത്തിലെ 'നാട്ടു നാട്ടു' ഗാനത്തിന് ലഭിച്ചു.

<strong>ബ്രഹ്മാസ്ത്ര 1 ശിവ-</strong> റോക്കി ഔർ റാണി കി പ്രേം കഹാനിക്ക് മുമ്പ് നൂറുകോടി ക്ലബിൽ ഇടംനേടിയ ആലിയ ചിത്രം. സൂപ്പർ നാച്വറൽ റൊമാൻസ് ചിത്രം അയൻ മുഖർജിയാണ് സംവിധാനം ചെയ്തത്. ഭർത്താവ് രൺബിർ കപൂറുമായുള്ള ആദ്യചിത്രം കൂടിയാണിത്. സിനിമ 257.44 കോടി രൂപയാണ് വാരിക്കൂട്ടിയത്.