Salaar | എല്ലാ സംശയങ്ങളും സലാര്‍ റിലീസോടെ തീരും ! കെജിഎഫ് 2 വിനേക്കാള്‍ വലിയ സ്കെയിലിലുള്ള സിനിമയെന്ന് പൃഥ്വിരാജ്

ഇന്ത്യന്‍ സിനിമാ ലോകം ഏറെ പ്രതീക്ഷയോടെ കാത്തിരിക്കുന്ന ചിത്രമാണ് സലാര്‍. കെജിഎഫ് സംവിധായകന്‍ പ്രശാന്ത് നീല്‍ ഒരുക്കുന്ന ഈ പാന്‍ ഇന്ത്യന്‍ ആക്ഷന്‍ ത്രില്ലറില്‍ ബാഹുബലി താരം പ്രഭാസും മലയാളത്തിന്‍റെ സ്വന്തം പൃഥ്വിരാജുമാണ് പ്രധാനവേഷങ്ങളിലെത്തുന്നത്.

ഹോംബാലെ ഫിലിംസ് നിര്‍മ്മിക്കുന്ന ചിത്രം മലയാളം, തമിഴ്, തെലുങ്ക്, കന്നട, ഹിന്ദി ഭാഷകളിലായി ഡിസംബര്‍ 22 ന് റിലീസ് ചെയ്യും. സലാര്‍ പാര്‍ട്ട് വണ്‍ സീസ് ഫയര്‍ എന്നാണ് സിനിമയുടെ മുഴുവന്‍ പേര്.

കെജിഎഫ് പോലെ രണ്ട് ഭാഗങ്ങളായാകും ചിത്രമെത്തുക. അടുത്തിടെ പുറത്തുവന്ന ചിത്രത്തിന്റെ ട്രെയിലറും വീഡിയോ സോങ്ങുമെല്ലാം സലാറിന്‍റെ പ്രേക്ഷക പ്രതീക്ഷ ഉയര്‍ത്തിയിട്ടുണ്ട്.

അഡ്വാന്‍സ് ബുക്കിങ്ങിലും മികച്ച പ്രതികരണമാണ് അനുഭവപ്പെടുന്നത്. പ്രഭാസ് അവതരിപ്പിക്കുന്ന ദേവ കഥാപാത്രവും പൃഥ്വിരാജ് അവതരിപ്പിക്കുന്ന വരദരാജ മന്നാര്‍ എന്ന കഥാപാത്രവും തമ്മിലുള്ള സുഹൃത് ബന്ധത്തിന്‍റെ കഥ കൂടിയാണ് പ്രഭാസ്.

പ്രേക്ഷകരെ ആവേശം കൊള്ളിക്കുന്ന പാട്ടുകളും പശ്ചാത്തല സംഗീതവും ഒരുക്കുന്നത് കെജിഎഫ് ഫെയിം രവി ബസ്രൂര്‍ ആണ്. കെജിഫ് 2 തീര്‍ത്ത വന്‍വിജയത്തിന് ശേഷം റിലീസാകുന്ന പ്രശാന്ത് നീല്‍ ചിത്രം എന്ന നിലയില്‍ സലാറും കെജിഎഫും തമ്മില്‍ വലിയ താരതമ്യം നടക്കുന്നുണ്ട് പ്രേക്ഷകര്‍ക്കിടയില്‍

എന്നാല്‍ സലാര്‍ ഷോ ആരംഭിച്ച് പത്ത് മിനിറ്റിനകം ഈ സംശയം പ്രേക്ഷകര്‍ക്ക് മാറുമെന്നാണ് നടന്‍ പൃഥ്വിരാജ് പറയുന്നത്. ന്യൂസ് 18ന് നല്‍കിയ പ്രത്യേക അഭിമുഖത്തിലാണ് താരം ഇക്കാര്യം പറഞ്ഞത്.

കെജിഎഫിനേക്കാള്‍ വലിയ ക്യാന്‍വാസിലാണ് സലാര്‍ ഒരുക്കിയിരിക്കുന്നത്. സെറ്റ് വര്‍ക്കിലാണെങ്കിലും സിനിമയുടെ സ്കെയിലില്‍ ആണെങ്കിലും ഇരുചിത്രങ്ങളും തമ്മില്‍ വലിയ വ്യത്യാസം കാണാം.

തിയറ്ററുകളിൽ സിനിമ കാണുമ്പോൾ പ്രേക്ഷകർക്കും ഇതേ ഫീൽ ലഭിക്കുമെന്ന് കരുതുന്നു. സാലറിന്റെ ലോകം മുഴുവൻ ഗെയിം ഓഫ് ത്രോൺസ് പോലെയാണെന്ന് ഞാൻ പ്രശാന്തിനോട് പറഞ്ഞിട്ടുണ്ട്. അത്തരത്തിലുള്ള നാടകീയതയും അവതരണവുമാണ് ഈ സിനിമയില്‍ ഉള്ളത്.

കെജിഎഫും സലാറിലെ ഖാന്‍സാറും തമ്മിലുള്ള സാമ്യതെയെ കുറിച്ച് നടക്കുന്ന ചര്‍ച്ചകളും കാണാറുണ്ട്. ഈ രണ്ട് സിനിമകളും തമ്മില്‍ ഒന്നിക്കുന്ന കാര്യത്തെ കുറിച്ച് പ്രശാന്ത് നീലിന്‍റെ ഉള്ളില്‍ പല ആശയങ്ങളുമുണ്ട്. എന്നാല്‍ ഇക്കാര്യത്തില്‍ അദ്ദേഹത്തിന് മാത്രമേ എന്തെങ്കിലും ഉറപ്പിച്ച് പറയാന്‍ കഴിയു എന്നും പൃഥ്വിരാജ് പറഞ്ഞു.

പ്രഭാസ്, പൃഥ്വിരാജ് എന്നിവര്‍ക്കു പുറമേ ശ്രുതി ഹാസന്‍, ജഗപതി ബാബു, ടിന്നു ആനന്ദ്, ഈശ്വരി റാവു, ശ്രീയ റെഡ്ഡി, രാമചന്ദ്ര രാജു എന്നിവരും പ്രധാന കഥാപാത്രമായി എത്തുന്നുണ്ട്.കേരളത്തിലെ തീയേറ്ററുകളില്‍ ചിത്രം വിതരണം ചെയ്യുന്നത് പൃഥ്വിരാജ് പ്രോഡക്ഷന്‍സും മാജിക് ഫ്രെയിംസും ചേര്‍ന്നാണ്.

ഛായാഗ്രഹണം - ഭുവന്‍ ഗൗഡ, പ്രൊഡക്ഷന്‍ ഡിസൈനര്‍ - ടി എല്‍ വെങ്കടചലപതി, ആക്ഷന്‍സ് - അന്‍മ്പറിവ്, കോസ്റ്റും - തോട്ട വിജയ് ഭാസ്‌കര്‍, എഡിറ്റര്‍ - ഉജ്വല്‍ കുല്‍കര്‍ണി, വി എഫ് എക്‌സ് - രാഖവ് തമ്മ റെഡ്ഡി. പി ആര്‍ ഒ. - മഞ്ജു ഗോപിനാഥ്, മാര്‍ക്കറ്റിംഗ് ബ്രിങ്‌ഫോര്‍ത്ത് അഡ്വര്‍ടൈസിംഗ്.ഡിജിറ്റല്‍ മാര്‍ക്കറ്റിംഗ് ഒബ്‌സ്‌ക്യൂറ എന്നിവരാണ് മറ്റു അണിയറ പ്രവര്‍ത്തകര്‍.