അനിമലിൽ നായികയാകേണ്ടിയിരുന്നത് രശ്മികയല്ല; മാപ്പ് ചോദിച്ച് സംവിധായകൻ സന്ദീപ് റെഡ്ഡി വാങ്ക

വിമർശനങ്ങൾക്കിടയിലും ബോക്സ് ഓഫീസിൽ വലിയ മുന്നേറ്റമുണ്ടാക്കിയ ചിത്രമാണ് സന്ദീപ് റെഡ്ഡി വാങ്ക സംവിധാനം ചെയ്ത അനിമൽ. റൺബീർ കപൂർ നായകനായെത്തിയ ചിത്രത്തിൽ രശ്മിക മന്ദാനയാണ് നായികാ വേഷത്തിൽ എത്തിയത്.

ചിത്രത്തിൽ രശ്മികയുടെ പ്രകടനം ഏറെ ശ്രദ്ധിക്കപ്പെടുകയും ചെയ്തിരുന്നു. എന്നാൽ, അനിമലിൽ നായികയായി എത്തേണ്ടിയിരുന്നത് പരിനീതി ചോപ്രയായിരുന്നു. സന്ദീപ് റെഡ്ഡി തന്നെ ഇക്കാര്യം സമ്മതിക്കുന്നുമുണ്ട്.

രശ്മിക അവതരിപ്പിച്ച ഗീതാഞ്ജലി എന്ന കഥാപാത്രത്തിനായി സംവിധായകൻ ആദ്യം സമീപിച്ചത് പരിനീതിയെയായിരുന്നു. എന്നാൽ പിന്നീട് പരിനീതിയെ ചിത്രത്തിൽ നിന്ന് മാറ്റി രശ്മികയെ നിശ്ചയിച്ചു.

ഇതിനെ കുറിച്ച് തുറന്നു പറയുകയാണ് സന്ദീപ് റെഡ്ഡി. ഗീതാഞ്ജലി എന്ന കഥാപാത്രത്തിന് പരിനീതി അനുയോജ്യയല്ല എന്ന് തോന്നിയതിനാലാണ് താൻ തീരുമാനം മാറ്റിയതെന്നാണ് സന്ദീപ് പറയുന്നത്.

ഒന്നര വർഷം മുമ്പാണ് ഗീതാഞ്ജലി എന്ന കഥാപാത്രത്തെ കുറിച്ച് പരിനീതിയോട് പറയുന്നത്. നടിയെ മാറ്റിയതിന്റെ പൂർണ ഉത്തരവാദിത്തം തനിക്കാണെന്ന് സംവിധായകൻ പറയുന്നു. തെറ്റ് തന്റേതാണെന്ന് അദ്ദേഹം സമ്മതിക്കുന്നു.

ഒന്നര വർഷം മുമ്പ് പരിനീതി സിനിമയിലേക്ക് വരാമെന്ന് ഒപ്പ് വെച്ചതാണ്. അത് സിനിമയുടെ ചിത്രീകരണം തുടങ്ങുന്നതിന് മുമ്പായിരുന്നു. പക്ഷേ, ചില കാരണങ്ങളാൽ ആ കഥാപാത്രത്തിന് പരിനീതി അനുയോജ്യയല്ലെന്ന് തനിക്ക് പിന്നീട് തോന്നി.

ചില കഥാപാത്രങ്ങൾ ചിലർക്ക് യോജിക്കില്ലെന്നാണ് സന്ദീപ് കാരണമായി പറയുന്നത്. പരിനീതിയോട് തന്നെ ഇക്കാര്യം പറഞ്ഞു. അവർക്ക് വേദനയായിട്ടുണ്ടാകും. പറ്റുമെങ്കിൽ തനിക്ക് മാപ്പ് നൽകുക.

പരിനീതിയുടെ സിനിമകൾ കണ്ടതു മുതൽ അവരുടെ ആരാധകനാണെന്നും സന്ദീപ് റെഡ്ഡി പറയുന്നു. തന്റെ ആദ്യ ചിത്രം കബീർ സിംഗിലേക്കും പരിനീതിയെ പരിഗണിച്ചിരുന്നു. ഷാഹിദ് കപൂർ നായകനായ ആ ചിത്രത്തിലേക്ക് നായികയായി എത്തിയത് കിയാര അദ്വാനിയായിരുന്നു.