സ്വപ്നം കണ്ടത് പോലൊരു ഭാര്യ; ആനിയ്ക്ക് പിറന്നാൾ ആശംസയുമായി ഷാജി കൈലാസ്

സ്വപ്നം കണ്ടതുപോലെ ഒരു ഭാര്യയെ കിട്ടാനുള്ള അനുഗ്രഹം എല്ലാവർക്കും ഉണ്ടായെന്നു വരില്ല, പക്ഷേ എനിക്കുണ്ടായി... പിറന്നാൾ ദിനത്തിൽ ഭാര്യ ആനിയ്ക്കുള്ള ഷാജി കൈലാസിന്റെ ജന്മദിനാശംസ തുടങ്ങുന്നതിങ്ങനെ

'അമ്മയാണേ സത്യം' എന്ന ബാലചന്ദ്രമേനോൻ സിനിമയിലൂടെയാണ് സ്കൂൾ വിദ്യാർഥിനിയായിരുന്ന ആനിയുടെ സിനിമ പ്രവേശം. ചുരുങ്ങിയ ചില വർഷങ്ങളിൽ ചുരുക്കം സിനിമകളിൽ മാത്രമേ അഭിനയിച്ചുവെങ്കിലും ആനി മലയാളി പ്രേക്ഷകർക്ക് ഇന്നും പ്രിയങ്കരി തന്നെ

സംവിധായകൻ ഷാജി കൈലാസുമായുള്ള വിവാഹശേഷം സിനിമാ ലോകത്തോട് ആനി വിട പറഞ്ഞെങ്കിലും ബിസിനസ് രംഗത്തിലും മിനി സ്ക്രീനിലും തന്റേതായ ഇടം തീർക്കാൻ ആനിയ്ക്ക് സാധിച്ചു

ടെലിവിഷൻ ഷോ അവതാരകയായും തിരുവനന്തപുരത്ത് ഹോട്ടൽ ബിസിനസ് മേധാവിയായും ആനി തിളങ്ങി. ടി.വി.യിലെ ആനിയുടെ കുക്കറി ഷോയ്ക്കും നിരവധി ആരാധകരുണ്ട്. ചില സന്ദർഭങ്ങളിൽ ആനിയുടെ പരാമർശങ്ങൾ വിവാദമായിട്ടുമുണ്ട്

മലയാള സിനിമയിൽ മോഹൻലാലിനൊപ്പം നായികാ വേഷം ചെയ്യാത്ത ഒരു മുൻനിര നായികയുണ്ടെങ്കിൽ അതും ആനി തന്നെ. മൂന്നു വർഷം നീണ്ട സിനിമാജീവിതത്തിൽ മമ്മൂട്ടി, ജയറാം, മുകേഷ് എന്നിവരുടെ നായികയായി ആനി വേഷമിട്ടിട്ടുണ്ട്

ഫേസ്ബുക് പോസ്റ്റിലെ ഷാജിയുടെ കുറിപ്പിന്റെ ബാക്കി പരിഭാഷ ഇങ്ങനെ: "എന്നെ സന്തോഷിപ്പിക്കുന്നത്, സങ്കടപ്പെടുത്തുന്നത് എന്തെന്ന് അവൾക്കറിയാം. എന്റെ സന്തോഷത്തിലും സന്താപത്തിലും അവൾ എനിക്കൊപ്പമുണ്ട്. നീ എനിക്ക് തന്ന സ്നേഹത്തിനും കരുതലിനും ഒരു ആശംസ ഒന്നുമാകുന്നില്ല. ഒട്ടേറെ ജന്മദിനങ്ങൾ ഉണ്ടാകട്ടെ എന്ന് ആശംസിക്കുന്നു."

മൂത്ത മകൻ ജഗൻ നടത്തുന്ന ഹോട്ടൽ ബിസിനസ്സിന്റെയും വിവിധയിനം സമോസകളുടെ നിർമ്മാണ കേന്ദ്രത്തിന്റെയും മേൽനോട്ടം ആനിയുടെതാണ്

മൂന്ന് മക്കളാണ് ഷാജി കൈലാസ്-ആനി ദമ്പതികൾക്കുള്ളത്; ജഗൻ, ഷാരോൺ, റുഷിൻ. ഇതിൽ ഇളയമകനായ റുഷിൻ 'താക്കോൽ' എന്ന ചിത്രത്തിൽ വേഷമിട്ടിട്ടുണ്ട്