Shreya Ghoshal|'എന്റെ ജീവിതത്തിലെ ഏറ്റവും മനോഹരമായ ഘട്ടം അനുഭവിക്കുന്നു'; നിറവയർ ചിത്രം പങ്കുവെച്ച് ശ്രേയാ ഘോഷാൽ

ആദ്യ കണ്മണിയെ വരവേൽക്കാനുള്ള കാത്തിരിപ്പിലാണ് ഗായിക ശ്രേയാ ഘോഷാലും ഭർത്താവ് ശൈലാദിത്യ മുഖപാധ്യായയും. നിറവയറുമായി നിൽക്കുന്ന ചിത്രങ്ങളാണ് ഞായറാഴ്ച ശ്രേയാ ഘോഷാൽ ഇൻസ്റ്റയിൽ പങ്കുവെച്ചിരിക്കുന്നത്. ജീവിതത്തിലെ ഏറ്റവും മനോഹരമായ ഘട്ടമാണ് അനുഭവിക്കുന്നതെന്ന് ശ്രേയ കുറിച്ചു. ദൈവത്തിന്റെ ദിവ്യ അത്ഭുതമെന്നും ശ്രേയാ വിശേഷിപ്പിക്കുന്നു. ഭർത്താവ് തന്നെയാണ് ചിത്രങ്ങൾ പകർത്തിയത്.

ബംഗാളിൽ നിന്നെത്തി ശബ്ദമാധുര്യത്തിലൂടെ മലയാളികളുടെ അടക്കം പ്രിയ ഗായികയായി മാറിയ പാട്ടുകാരിയാണ് ശ്രേയ ഘോഷാൽ.  ഏതാനും ദിവസങ്ങൾക്ക് മുൻപാണ് സന്തോഷ വാർത്ത ശ്രേയ ആരാധകര്‍ക്കായി പങ്കുവെച്ചത്. ജീവിതത്തിലെ ഏറ്റവും പ്രധാനപ്പെട്ട കാര്യം ഗായിക പങ്കുവെക്കുമ്പോൾ മലയാളികൾ അടക്കമുള്ള ആരാധകരും ആശംസകളുമായി എത്തിയിരുന്നു.

ജീവിതത്തിൽ പുതിയൊരാൾ കൂടി എത്തുന്ന വാർത്തയാണ് ശ്രേയ സോഷ്യൽമീഡിയയിലൂടെ ആരാധകരുമായി പങ്കുവെച്ചത്. ഗർഭിണിയായ ചിത്രവും ഗായിക ഇൻസ്റ്റഗ്രാമിൽ പോസ്റ്റ് ചെയ്തിരുന്നു.

ആരാധകരുമായി ഈ സന്തോഷവാർത്ത പങ്കുവെക്കുന്നതിൽ ഏറെ സന്തോഷമുണ്ടെന്നും ജീവിതത്തിലെ പുതിയ അധ്യായത്തിനായുള്ള കാത്തിരിപ്പിലാണെന്നും ശ്രേയ കുറിച്ചു. ആരാധകരുടെ സ്നേഹവും പ്രാർത്ഥനയും കൂടെയുണ്ടാകണമെന്നും ഗായിക ആരാധകരോട് ആവശ്യപ്പെടുകയും ചെയ്തു.

2015 ലാണ് ശ്രേയ ഘോഷാലും ശൈലാദിത്യയും  വിവാഹിതരായത്. ബാല്യകാല സുഹൃത്തിനെ തന്നെയാണ് ശ്രേയ ജീവിത പങ്കാളിയാക്കിയത്. ശൈലാദിത്യ മുഖോപാധ്യായ എന്നാണ് മുഴുവൻ പേര്.

ഇന്ത്യൻ ചലച്ചിത്ര രംഗത്ത് ഏറ്റവും കൂടുതൽ ആരാധകരുള്ള ഗായികയാണ് ശ്രേയ ഘോഷാൽ. ബോളിവുഡിന് പുറമേ, ഉര്‍ദു, ആസാമീസ്, ബംഗാളി, ഭോജ്പുരി, കന്നഡ, ഒഡിയ, മലയാളം, പഞ്ചാബി, തമിഴ്, മറാത്തി, തെലുങ്ക് തുടങ്ങി നിരവധി ഭാഷകളിൽ ശ്രേയ ഹിറ്റ് ഗാനങ്ങൾ സമ്മാനിച്ചിട്ടുണ്ട്.

നാല് തവണ മികച്ച ഗായികയ്ക്കുള്ള ദേശീയ പുരസ്‌കാരം നേടി.  മികച്ച പിന്നണി ഗായികയ്ക്കുള്ള അവാർഡുകളിൽ അഞ്ചെണ്ണമുൾപ്പെടെ 6 ഫിലിം ഫെയർ അവർഡുകൾ, മികച്ച പിന്നണി ഗായികയ്ക്കുള്ള ഒൻപത് സൗത്ത് ഫിലിം ഫെയർ പുരസ്കാരങ്ങൾ മികച്ച ഗായികയ്ക്കുള്ള രണ്ട് തമിഴ്‍നാട് സ്റ്റേറ്റ് ഫിലിം അവാർഡ്, 2009, 2011, 2014, 2018 വർഷങ്ങളിലെ മികച്ച ഗായികക്കുള്ള കേരളസംസ്ഥാന അവാർഡും ശ്രേയാ ഘോഷാൽ  സ്വന്തമാക്കിയിട്ടുണ്ട്.

ടെലിവിഷൻ റിയാലിറ്റി ഷോയിലൂടെയാണ് ശ്രേയ പിന്നണി ഗാനരംഗത്തേക്ക് എത്തുന്നത്. അന്യ ഭാഷകളിലെ ഗാനംആലപിക്കുമ്പോഴും ഉച്ചാരണം ഭംഗിയാക്കുന്നുവെന്നതാണ് ശ്രേയ ഘോഷാലിനെ  ഭാഷാഭേദമന്യേ   പ്രിയങ്കരിയാക്കിയത്.