Sushant Singh Rajput| ആശുപത്രിയില്‍ വെച്ച് സുശാന്തിന്റെ മൃതദേഹത്തിൽ കൈവെച്ച് റിയ 'സോറി' പറഞ്ഞു: പുതിയ വെളിപ്പെടുത്തൽ

ബോളിവുഡ് താരം സുശാന്ത് സിംഗ് രാജ്പുതിന്റെ മരണവുമായി ബന്ധപ്പെട്ട് ഓരോ ദിവസവും പുതിയ പുതിയ വെളിപ്പെടുത്തലുകളാണ് പുറത്തു വരുന്നത്.

മരണവുമായിബന്ധപ്പെട്ട് സുശാന്തിന്റെ കാമുകി റിയ ചക്രബർത്തിയ്ക്കും കുടുംബത്തിനുമെതിരെ സുശാന്തിന്റെ കുടുംബം രംഗത്തെത്തിയിരിക്കുകയാണ്. റിയയെ അനുകൂലിച്ചും പ്രതികൂലിച്ചുമുള്ള പ്രതികരണങ്ങളും പുറത്തുവരുന്നുണ്ട്.

സുശാന്തിന്റെ മൃതദേഹം കാണാൻ ആശുപത്രിയിലെത്തിയ റിയ മൃതദേഹത്തിൽ തൊട്ട് മാപ്പ് പറഞ്ഞതായ പ്രതികരണമാണ് ഇപ്പോൾ പുറത്തുവന്നിരിക്കുന്നത്.

റിയയ്ക്കൊപ്പം അന്ന് ആശുപത്രിയിലുണ്ടായിരുന്ന സുർജീത് സിംഗ് റാത്തോർ എന്നയാളാണ് ഇക്കാര്യം വ്യക്തമാക്കിയിരിക്കുന്നത്.

അമ്മയ്ക്കും സഹോദരൻ ഷോവിക് ചക്രബർത്തിക്കുമൊപ്പമാണ് റിയ മൃതദേഹം സൂക്ഷിച്ചിരുന്ന കൂപ്പർ ആശുപത്രിയിലെത്തിയതെന്നും എന്നാൽ അമ്മയെയും സഹോദരനെയും സുശാന്തിന്റെ മൃതദേഹം കാണാൻ മുംബൈ പൊലീസ് അനുവദിച്ചില്ലെന്നും സുർജീത് പറഞ്ഞു.

സുശാന്തിന്റെ മുഖത്തു നിന്ന് പുതപ്പിച്ചിരുന്ന തുണി മാറ്റിയത് താനാണെന്നും സുർജീത് പറഞ്ഞു. സുശാന്തിന്റെ മൃതദേഹത്തിൽ നെഞ്ചിൽ കൈവെച്ച് 'സോറി ബാബു' എന്ന് പറഞ്ഞെന്നും കരച്ചിലടക്കാൻ സാധിക്കാതിരുന്ന റിയയെ താൻ പുറത്തേക്ക് കൊണ്ടുവരികയായിരുന്നുവെന്നും ഇയാൾ വ്യക്തമാക്കുന്നു.

എന്തിനാണ് റിയ ആ സമയത്ത് സുശാന്തിനോട് മാപ്പ് പറഞ്ഞതെന്ന് ഇപ്പോഴും മനസിലാകുന്നില്ലെന്നാണ് സുർജീത് പറയുന്നത്.

അതേസമയം സുശാന്തിൻറെ മരണവുമായി ബന്ധപ്പെട്ട കേസിൽ സിബിഐ അന്വേഷണത്തിന് സുപ്രീംകോടതി ഉത്തരവിട്ടിരുന്നു. സിബിഐ അന്വേഷണം ആരംഭിച്ചിരിക്കുകയാണ്.

ഇതിനെ തുടർന്ന് റിയയ്ക്കും കുടുംബത്തിനുമെതിരെ സിബിഐ എഫ്ഐആർ രജിസ്റ്റർ ചെയ്തിരിക്കുകയാണ്. സിബിഐ പൊലീസ് സൂപ്രണ്ട് നൂപുർ പ്രസാദിന്റെ നേതൃത്വത്തിലാണ് അന്വേഷണം നടക്കുന്നത്.

ജൂൺ14നാണ് ബാന്ദ്രയിലെ അപ്പാർട്ട്മെന്റിൽ തൂങ്ങി മരിച്ച നിയിൽ സുശാന്തിന്റെ മൃതദേഹം കണ്ടെത്തിയത്. തുടക്കത്തിൽ കേസ് അന്വേഷിച്ചത് മുംബൈ പൊലീസ് ആയിരുന്നു.