തീരദേശത്ത് തിരഞ്ഞെടുപ്പ് ആവേശം; വോട്ടുറപ്പിക്കാൻ പുതിയാപ്പ ഹാർബറിൽ ജലഘോഷയാത്ര സംഘടിപ്പിച്ചു

നിയമസഭ തിരഞ്ഞെടുപ്പിൽ വോട്ടർമാരുടെ പങ്കാളിത്തം വർധിപ്പിക്കാൻ ജില്ലാ ഭരണകൂടത്തിൻ്റെ നേതൃത്വത്തിൽ നടത്തിവരുന്ന സ്വീപ്പ് പ്രചാരണ പരിപാടികളുടെ ഭാഗമായി ജലഘോഷയാത്ര സംഘടിപ്പിച്ചു.

ഫിഷറീസ് വകുപ്പിൻ്റെ സഹകരണത്തോടെ പുതിയാപ്പ ഹാർബറിൽ സംഘടിപ്പിച്ച പരിപാടി ജില്ലാ കലക്ടർ സ്നേഹിൽ കുമാർ സിങ് ഫ്ലാഗ് ഓഫ് ചെയ്തു. സ്വീപ്പ് ബോട്ട് ഇൻസ്റ്റലേഷൻ അനാച്ഛാദനവും കലക്ടർ നിർവഹിച്ചു.

തീരദേശ മേഖലയിലെ ജനങ്ങളെ പങ്കെടുപ്പിച്ചുകൊണ്ട് 'നോ വോട്ടർ ലെഫ്റ്റ് ബിഹൈൻഡ്', 'നമ്മുടെ വോട്ട് നമ്മുടെ അഭിമാനം', 'നാളെയുടെ ഭാവി ഇന്നിൻ്റെ വോട്ട്', 'ഐ വോട്ട് ഫോർ ഷുവർ' തുടങ്ങിയ മുദ്രാവാക്യങ്ങളുമായി ബോട്ടുകൾ ഘോഷയാത്ര നടത്തി.

ചടങ്ങിൽ അസിസ്റ്റൻ്റ് കലക്ടർ ഡോ. എസ് മോഹനപ്രിയ, ഫിഷറീസ് കോഓപറേറ്റീവ് ഇൻസ്പെക്ടർ സി കെ ശ്രീജിത്ത് ശ്രീധരൻ, ജില്ലാ ഇൻഫർമേഷൻ ഓഫീസർ സി പി അബ്ദുൽ കരീം, സ്വീപ്പ് അസിസ്റ്റൻ്റ് നോഡൽ ഓഫീസർ ഡോ. നിജീഷ് ആനന്ദ്, കാലിക്കറ്റ് യൂണിവേഴ്സിറ്റി ജില്ല എൻ.എസ്.എസ്. കോഓഡിനേറ്റർ ഫസീൽ അഹമ്മദ്, ആര്യസമാജം സെക്രട്ടറി സി ദേവദാസൻ, പുതിയാപ്പ നോർത്ത് മത്സ്യ സഹകരണ സംഘം പ്രസിഡൻ്റ് സി വിവത്സു, പുതിയാപ്പ സൗത്ത് മത്സ്യതൊഴിലാളി സഹകരണ സംഘം പ്രസിഡൻ്റ് വി ഉമേശൻ തുടങ്ങിയവർ പങ്കെടുത്തു.