കല്ലറയിൽ ഇനി ഹെലികോപ്റ്റർ പറന്നിറങ്ങും; NCC കേഡറ്റുകൾക്ക് പുതിയ പരിശീലന കേന്ദ്രം

രണ്ട് കോടി രൂപ ചെലവഴിച്ച് ഒന്നാം ഘട്ടത്തിൽ നിർമ്മാണം പൂർത്തിയാക്കിയ ഹെലിപാഡും വിശാലമായ പരേഡ് ഗ്രൗണ്ടും കേഡറ്റുകളുടെ കായികക്ഷമതയും അച്ചടക്കവും വർദ്ധിപ്പിക്കുന്നതിനായി മന്ത്രി ആർ. ബിന്ദു ഔദ്യോഗികമായി നാടിന് സമർപ്പിച്ചു.

പദ്ധതിയുടെ രണ്ടാം ഘട്ടത്തിൽ അത്യാധുനിക സൗകര്യങ്ങളോട് കൂടിയ ക്യാമ്പ് ഓഫീസ് സമുച്ചയം, വിപുലമായ കിച്ചൻ സൗകര്യം, സ്റ്റോർ റൂമുകൾ എന്നിവയാണ് ഉൾപ്പെടുത്തിയിരിക്കുന്നത്. ഇതിൻ്റെ നിർമ്മാണോദ്ഘാടനം ചടങ്ങിൽ വച്ച് മന്ത്രി നിർവഹിക്കുകയുണ്ടായി.

കേരളത്തിലെ കേഡറ്റുകൾക്ക് പുറമെ ഇന്ത്യയുടെ വിവിധ ഭാഗങ്ങളിൽ നിന്നുള്ള തിരഞ്ഞെടുക്കപ്പെട്ട എൻസിസി അംഗങ്ങൾക്കും കല്ലറയിലെ ഈ പുതിയ കേന്ദ്രത്തിൽ അന്താരാഷ്ട്ര നിലവാരത്തിലുള്ള പരിശീലനവും താമസ സൗകര്യങ്ങളും ലഭ്യമാക്കുമെന്ന് അധികൃതർ ചടങ്ങിൽ വ്യക്തമാക്കി.

മൂന്നാം ഘട്ടത്തിൽ ഡൈനിങ് ഹാൾ, കോൺഫറൻസ് റൂം, മെഡിക്കൽ സെൻ്റർ, ക്ലാസ് റൂമുകൾ, ഫയറിങ് റേഞ്ച് എന്നിവ നിർമ്മിക്കും. കേഡറ്റുകളുടെ സമഗ്രമായ വളർച്ചയ്ക്ക് ആവശ്യമായ എല്ലാ സംവിധാനങ്ങളും ഇവിടെ ഉറപ്പാക്കുന്നതാണ്.

എൻസിസി പരിശീലനത്തിന് പുറമെ, പ്രകൃതിക്ഷോഭങ്ങളും മറ്റ് അത്യാഹിതങ്ങളും ഉണ്ടാകുന്ന സാഹചര്യത്തിൽ ജില്ലാ ഭരണകൂടത്തിന് ദുരന്തനിവാരണ പ്രവർത്തനങ്ങൾ ഏകോപിപ്പിക്കുന്നതിനുള്ള ഒരു താവളമായും ഈ കേന്ദ്രം ഭാവിയിൽ പ്രവർത്തിക്കുന്ന രീതിയിലാണ് വിഭാവനം ചെയ്തിരിക്കുന്നത്.​