രാമസേതു സ്മരണയില്‍ പ്രാര്‍ത്ഥനാനിരതനായി പ്രധാനമന്ത്രി ധനുഷ്കോടിയില്‍; അരിചാൽ മുനൈ സന്ദര്‍ശിച്ച് മോദി

അയോധ്യ രാമക്ഷേത്രത്തിലെ പ്രാണ പ്രതിഷ്ഠയ്ക്ക് മുന്നോടിയായി പ്രധാനമന്ത്രി നരേന്ദ്രമോദി ധനുഷ്കോടിയില്‍ സന്ദര്‍ശനം നടത്തി. രാമായണവുമായി ബന്ധപ്പെട്ട ദക്ഷിണേന്ത്യയിലെ സുപ്രധാന സ്ഥലമാണ് ധനുഷ്കോടി

രാവണനെ പരാജയപ്പെടുത്തുമെന്ന് ഭഗവാൻ ശ്രീരാമന്‍ പ്രതിജ്ഞയെടുത്തത് ധനുഷ്കോടിയില്‍ വെച്ച് ആണെന്നാണ് വിശ്വാസം.

ധനുഷ്കോടിയിലെ പ്രസിദ്ധമായ കോദണ്ഡരാമസ്വാമി ക്ഷേത്രം സന്ദര്‍ശിച്ച മോദി രാമസേതുവിന്‍റെ ആരംഭസ്ഥാനമായ അരിചാല്‍ മുനൈയും സന്ദര്‍ശിച്ചു.

സീതാദേവിയെ മടക്കികൊണ്ട് വരാന്‍ ലങ്കയിലേക്ക് പുറപ്പെട്ട ശ്രീരാമന് വാനരസൈന്യം കടലില്‍ നിര്‍മ്മിച്ച് നല്‍കിയ പാലമാണ് രാമസേതു.

രാമേശ്വരം തീര്‍ത്ഥാടനത്തിന് എത്തുന്ന ഭക്തജനങ്ങള്‍ ധനുഷ്കോടി കോദണ്ഡരാമസ്വാമി ക്ഷേത്രത്തിലും അരിചാല്‍ മുനൈയിലും എത്തി ദര്‍ശനം നടത്തിയ ശേഷമാണ് മടങ്ങി പോകുന്നത്.

ഇന്നലെ തിരുച്ചിറപ്പള്ളി ശ്രീരംഗം രംഗനാഥ സ്വാമി ക്ഷേത്രത്തിലും രാമേശ്വരം രാമനാഥസ്വാമി ക്ഷേത്രത്തിലും പ്രധാനമന്ത്രി ദര്‍ശനം നടത്തിയിരുന്നു.

രാമേശ്വരം ക്ഷേത്രത്തിലെ പ്രസിദ്ധമായ 22 തീര്‍ത്ഥ കിണറുകളിലെ സ്നാനവും കടല്‍ക്കരയിലെ അഗ്നി തീര്‍ത്ഥ സ്നാനവും മോദി നടത്തിയിരുന്നു.

ലങ്കയില്‍ നിന്ന് തിരിച്ചെത്തിയതിന് പിന്നാലെ ശ്രീരാമനും സീതയും ചേര്‍ന്ന് കടല്‍ക്കരയില്‍ പ്രതിഷ്ഠ നടത്തിയ ശിവലിംഗമാണ് രാമനാഥസ്വാമി ക്ഷേത്രത്തിലെ ആരാധനാമൂര്‍ത്തി.

കഴുത്തില്‍ രുദ്രാക്ഷമാല ധരിച്ച് കടലില്‍ മുങ്ങിനിവരുന്ന മോദിയുടെ ദൃശ്യങ്ങള്‍ സമൂഹമാധ്യമങ്ങളില്‍ വൈറലായി കഴിഞ്ഞു.

ധനുഷ്കോടി സന്ദര്‍ശനം പൂര്‍ത്തിയാക്കിയ പ്രധാനമന്ത്രി രാമക്ഷേത്ര പ്രതിഷ്ഠയ്ക്കായി വൈകിട്ട് അയോധ്യയിലെത്തും. ജനുവരി 22 ന് ഉച്ചയ്ക്ക് 12:15 നും 12:45 നും ഇടയിലുള്ള മുഹൂര്‍ത്തത്തിലാണ് പ്രാണ പ്രതിഷ്ഠ