വധു ബന്ധുവിനൊപ്പം നൃത്തം ചെയ്തു; വിവാഹദിവസം തന്നെ വരന്‍ ബന്ധം ഉപേക്ഷിച്ചു

വിവാഹ ദിവസം രാത്രിയില്‍ തന്നെ വരന്‍ തന്റെ നവവധുവിനെ ഉപേക്ഷിച്ചു. ഇതിന്റെ കാരണമാണ് ഞെട്ടിക്കുന്നത്. വധു ബന്ധുവായ യുവാവിനൊപ്പം നൃത്തം ചെയ്തതാണ് വരനെ ചൊടിപ്പിച്ചത്. ഇതോടെ അയാള്‍ ബന്ധം ഉപേക്ഷിക്കുകയായിരുന്നു.

ദമ്പതികളുടെ വിവാഹ ചടങ്ങ് സന്തോഷകരമായാണ് ആരംഭിച്ചത്. എന്നാല്‍ വധുവിന്റെ നൃത്തത്തെ ചൊല്ലിയുള്ള അഭിപ്രായവ്യത്യാസങ്ങള്‍ ചൂടേറിയ തര്‍ക്കവിഷയമായതോടെ സാഹചര്യം കൂടുതല്‍ വഷളായി. വധു തന്റെ ബന്ധു സഹോദരങ്ങള്‍ക്കൊപ്പം നൃത്തം ചെയ്യുന്നത് കണ്ടതോടെ വരന്‍ അസ്വസ്ഥനായി. ഇതാണ് പ്രശ്‌നത്തിന് കാരണം. ഇതേച്ചൊല്ലി ദമ്പതികൾ തമ്മിൽ‌ വാക്കുതർക്കമായി.

സംഭവത്തിന്റെ വീഡിയോ ദൃശ്യങ്ങളാണ് ഓണ്‍ലൈനില്‍ പ്രചരിക്കുന്നത്. വരന്‍ വധുവിനോട് ആക്രോശിക്കുകയും അതിഥികള്‍ക്ക് മുന്നില്‍വെച്ച് അവളോട് അപമര്യാദയായി പെരുമാറുകയും ചോദ്യം ചെയ്യുകയും ചെയ്യുന്നത് വീഡിയോ ദൃശ്യങ്ങളില്‍ കാണാം. വധുവും അയാളോട് രൂക്ഷമായി തന്നെ പ്രതികരിക്കുന്നുണ്ട്. എന്നാല്‍ വിവാഹത്തില്‍ പങ്കെടുക്കാനെത്തിയവര്‍ അവരെ ശാന്തരാക്കാനും പിടിച്ചുമാറ്റാനും ശ്രമിക്കുന്നു. ഇതൊന്നും വകവെയ്ക്കാതെ ദമ്പതികള്‍ പരസ്പരം തര്‍ക്കിക്കുന്നത് വീഡിയോയില്‍ കാണാം.

താന്‍ ഈ ബന്ധം അവസാനിപ്പിക്കുകയാണെന്ന് വരന്‍ പ്രഖ്യാപിച്ചതോടെയാണ് തര്‍ക്കം തീര്‍ന്നത്. അങ്ങനെ താലി ചാര്‍ത്തി മണിക്കൂറുകള്‍ക്കുള്ളില്‍ ഒരു വിവാഹബന്ധം വേര്‍പിരിഞ്ഞു.

സംഭവം സോഷ്യല്‍ മീഡിയയില്‍ വളരെ പെട്ടെന്ന് വൈറലായി. ഉപയോക്താക്കള്‍ വരന്റെ പ്രതികരണത്തില്‍ ഞെട്ടലും അവിശ്വാസവും പ്രകടിപ്പിച്ചു. പൊസസ്സീവ്, ഇന്‍സെക്വര്‍ തുടങ്ങിയ വാക്കുകളിലൂടെ ആളുകള്‍ അയാളെ വിമര്‍ശിച്ചു. ചിലര്‍ യുവതിക്കുള്ള പിന്തുണ പ്രതികരണങ്ങളിലൂടെ അറിയിച്ചു. കരയരുതെന്നും ഇത് നിങ്ങളുടെ ജീവിതത്തില്‍ ലഭിച്ച രണ്ടാമത്തെ അവസരമായി കാണണമെന്നും നിങ്ങള്‍ രക്ഷപ്പെട്ടുവെന്നും ഒരാള്‍ വധുവിനു വേണ്ടി കുറിച്ചു.

അവള്‍ ഒരു ബുള്ളറ്റില്‍ നിന്നും രക്ഷപ്പെട്ടുവെന്നായിരുന്നു ഒരു പ്രതികരണം. അവള്‍ക്ക് തന്റെ ജീവിതകാലം മുഴുവന്‍ അറിയുന്ന ബന്ധുവിനൊപ്പം നൃത്തം ചെയ്തപ്പോള്‍ അസൂയ തോന്നിയ വരന്‍ എത്രമാത്രം അരക്ഷിതാവസ്ഥ ഉള്ളിലുള്ളവനായിരിക്കുമെന്ന് ഒരാള്‍ ചോദിച്ചു. വിവാഹമോചനം നേടുന്നത് തന്നെയാണ് പെണ്‍കുട്ടിക്കും നല്ലത് എന്ന തരത്തിലുള്ള പ്രതികരണങ്ങളും വന്നു.