'അടുത്ത ആഴ്ച മുതൽ തൊഴിൽ രഹിതനാണ്; എന്തെങ്കിലും ഓഫർ ഉണ്ടോ?' പരിശീലകസ്ഥാനം ഒഴിയുന്നതിൽ രാഹുൽ ദ്രാവിഡ്‌

ഇന്ത്യയുടെ ടി20 ലോകകപ്പ് വിജയത്തിന് പിന്നാലെ പരിശീലക സ്ഥാനം ഒഴിയാൻ തയ്യാറാവുകയാണ് രാഹുൽ ദ്രാവിഡ്‌. ലോകകപ്പ് വിജയത്തിന് ശേഷം അദ്ദേഹം ഇക്കാര്യം സ്ഥിരീകരിച്ചിരുന്നു. ഒപ്പം അടുത്ത ആഴ്ച മുതൽ തനിക്ക് ജോലി ഇല്ലാതെയാകാൻ പോകുന്നുവെന്നും തമാശ രൂപേണ അദ്ദേഹം മാധ്യമപ്രവർത്തകരോട് പറഞ്ഞു. മൂന്ന് വർഷത്തോളം ഇന്ത്യൻ ടീമിന്റെ പരിശീലകനായിരുന്ന ദ്രാവിഡ്‌ പരിശീലക സ്ഥാനം ഒഴിയുമെന്ന വിവരം ഈ മാസം ആദ്യം അദ്ദേഹം തന്നെ വെളിപ്പെടുത്തിയിരുന്നു. പരിശീലകന്റെ പദവിയിലേക്കുള്ള പുതിയ അപേക്ഷകൾ ബിസിസിഐ ക്ഷണിച്ചിരുന്നുവെങ്കിലും ദ്രാവിഡ്‌ അപേക്ഷ സമർപ്പിച്ചിരുന്നില്ല എന്നാണ് വിവരം. ഇന്ത്യൻ ടീം ക്യാപ്റ്റൻ രോഹിത് ശർമ്മ നിർബന്ധിച്ചിട്ടും പരിശീലക സ്ഥാനത്ത് തുടരാൻ ദ്രാവിഡ്‌ തയ്യാറായിരുന്നില്ലെന്നും വാർത്തകളുണ്ടായിരുന്നു.