NIMCET | എൻ.ഐ.ടി. എം.സി.എ. കോമൺ എൻട്രൻസ് ടെസ്റ്റ് പരീക്ഷയ്ക്ക് അപേക്ഷിക്കാം; വിശദാംശങ്ങള്‍

കോമൺ എൻട്രൻസ് ടെസ്റ്റ് – എൻ.ഐ.എം.സി.ഇ.ടി (നിംസെറ്റ്) 2023- പ്രവേശന പരീക്ഷയിലൂടെയാണ് പ്രവേശനം. അഗർത്തല, അലഹബാദ്, ഭോപ്പാൽ, ജംഷദ്പൂർ, കുരുക്ഷേത്ര, റായ്പൂർ, സൂറത്കൽ, തിരുച്ചിറപ്പള്ളി, വാറംഗൽ എന്നീ 9 നാഷണൽ ഇൻസ്റ്റിറ്റ്യൂട്ട്സ് ഓഫ് ടെക്നോളജി കളിലാണ് അവസരം.

എൻ.ഐ.ടി .കൾ നടത്തുന്ന 2023 – 2024 അധ്യയന വർഷത്തെ മാസ്റ്റർ ഓഫ് കംപ്യൂട്ടർ ആപ്ലിക്കേഷൻസ് (എം.സി.എ) പ്രോഗ്രാമിന് അപേക്ഷിക്കാൻ ഏപ്രിൽ 10 വരെയാണ് അവസരം. കേരളത്തിൽ കോഴിക്കോടും പരീക്ഷാ കേന്ദ്രങ്ങളുണ്ട്.

കേരളത്തിലെ വിവിധ യൂണിവേഴ്സിറ്റികൾ 2 വർഷത്തെ  കോഴ്സ് നടത്തുന്നുണ്ടെങ്കിലും എൻ.ഐ.ടി.യിൽ 3 വർഷമാണ് ദൈർഘ്യം. വാറങ്കലിലും ജംഷഡ്പൂരിലും കോഴ്സിൻ്റെ രണ്ടാം വർഷം വിജയകരമായി പൂർത്തിയാക്കുന്നവർക്ക് പോസ്റ്റ് ഗ്രാജ്വേറ്റ് അഡ്വാൻസ്ഡ് ഡിപ്ലോമ ഇൻ കംപ്യൂട്ടർ ആപ്ലിക്കേഷൻസ് യോഗ്യതയുമായി പുറത്തു വരാം. അതായത് എക്സിറ്റ് ഓപ്ഷനുണ്ട്. കുരുക്ഷേത്രയിൽ സ്വാശ്രയ രീതിയിലാണ് കോഴ്സ് നടത്തുന്നത്.

മാത്തമാറ്റിക്സ്/സ്റ്റാറ്റിസ്റ്റിക്സ് ഒരു വിഷയമായി പഠിച്ച്, കുറഞ്ഞത് മൂന്നു വർഷം ദൈർഘ്യമുള്ള കോഴ്സിലൂടെ ഏതെങ്കിലും വിഷയത്തിലെ ബിരുദം അല്ലെങ്കിൽ ബി.ഇ/ബി.ടെക് ബിരുദമുള്ളവർക്കാണ് അപേക്ഷിക്കാനവസരം. യോഗ്യതാ പ്രോഗ്രാമിൽ, മൊത്തത്തിൽ കുറഞ്ഞത് 60% മാർക്ക്/സി.ജി.പി.എ 6.5 (പട്ടിക/ഭിന്നശേഷിക്കാർക്ക് 55%/സി.ജി.പി.എ 6.0) നിർബന്ധമായും വേണം.

2023 ജൂൺ 11 ന് രാവിലെ 9 മുതൽ 11 വരെ ഓൺലൈൻ ആയി നടത്തുന്ന നിംസെറ്റ്  പരീക്ഷയ്ക്ക്  120 മൾട്ടിപ്പിൾ ചോയ്സ് ചോദ്യങ്ങളുണ്ടാകും.മാത്തമാറ്റിക്സ് (50 ചോദ്യങ്ങൾ), അനലറ്റിക്കൽ എബിലിറ്റി & ലോജിക്കൽ റീസണിംഗ് (40), കംപ്യൂട്ടർ അവയർനസ് (20), ജനറൽ ഇംഗ്ലീഷ് (10) എന്നിങ്ങനെയാണ്.

വിഷയങ്ങളിൽനിന്നുള്ള ചോദ്യങ്ങൾ .മാത്തമാറ്റിക്സിൽ ഓരോ ശരിയുത്തരത്തിനും 12 മാർക്ക് കിട്ടും. ഉത്തരം തെറ്റിയാൽ 3 മാർക്ക് നഷ്ടമാകും. ജനറൽ ഇംഗ്ലീഷിന് ഇത് യഥാക്രമം 4, 1 എന്നിങ്ങനെയുo മറ്റ് രണ്ട് വിഷയങ്ങൾക്ക് 6, 1.5 എന്നിങ്ങനെയും ആയിരിക്കും ശരിയുത്തരത്തിന് കിട്ടുന്ന മാർക്കുകളും തെറ്റുത്തരത്തിന് നഷ്ടപെടുന്ന മാർക്കുകളും . യോഗ്യത നേടുന്നവരുടെ വിവിധ സെക്ഷനുകളിലെ മാർക്ക് കൂട്ടിയാണ് റാങ്ക് നിർണയിക്കുന്നത്.

ഏപ്രിൽ 10, വൈകിട്ട് 5 വരെ ഓൺലൈൻ ആയി അപേക്ഷ നൽകാവുന്നതാണ്. ഇപ്പോൾ യോഗ്യതാ പരീക്ഷ അഭിമുഖീകരിക്കുന്നവർക്കും അപേക്ഷിക്കാനവസരമുണ്ട്. 2500 രൂപയാണ് ,അപേക്ഷാ ഫീസ്.പട്ടികജാതി വർഗ/ഭിന്നശേഷി വിഭാഗക്കാർക്ക്, 1250 രൂപ മതി. ഫീസ് ഓൺലൈനായി അടയ്ക്കണം.

അപേക്ഷയിലെ വിവരങ്ങൾ എഡിറ്റ് ചെയ്യാൻ ഏപ്രിൽ13 മുതൽ 17 വരെ അവസരമുണ്ടായിരിക്കും. അഡ്മിറ്റ് കാർഡ് ജൂൺ 1 മുതൽ വെബ്സൈറ്റിൽ നിന്നും ഡൗൺലോഡു ചെയ്തെടുക്കാം.ജൂൺ 11 ന് നടക്കുന്ന പരീക്ഷയുടെ ഫലപ്രഖ്യാപനം, ജൂൺ 26 ന് നടക്കും.