വനിതകൾക്ക് ഐഐടി ഹൈദരാബാദിൽ അസിസ്റ്റന്റ് പ്രൊഫസർ തസ്തികയിലേക്ക് അപേക്ഷിക്കാം; ശമ്പളം ഒരു ലക്ഷം

അസിസ്റ്റന്റ് പ്രൊഫസർ ഗ്രേഡ് 1 തസ്തികയിലേക്ക് അപേക്ഷിക്കുന്ന ഉദ്യോഗാർത്ഥികൾക്ക് പിഎച്ച്‌ഡിക്ക് ശേഷം കുറഞ്ഞത് മൂന്ന് വർഷത്തെ ടീച്ചിങ്ങ്, ഗവേഷണം അല്ലെങ്കിൽ പ്രൊഫഷണൽ എക്സ്പീരിയൻസ് ഉണ്ടായിരിക്കണം. പിഎച്ച്ഡി പഠിക്കുന്ന സമയത്തുള്ള ടീച്ചിങ്ങ് എക്സ്പീരിയൻസ് പരി​ഗണിക്കുന്നതല്ല. ഇവർ പ്രശസ്തമായ ജേണലുകളിലും കോൺഫറൻസുകളിലും തങ്ങളുടെ പഠനങ്ങൾ പ്രസിദ്ധീകരിച്ചിരിക്കണം. 1,01,500 രൂപ ആയിരിക്കും അടിസ്ഥാന ശമ്പളം, ഇതോടൊപ്പം മറ്റ് അലവൻസുകളും ഉണ്ടാകും.

അസിസ്റ്റന്റ് പ്രൊഫസർ ഗ്രേഡ് II തസ്തികകളിലേക്ക് അപേക്ഷിക്കുന്ന ഉദ്യോ​ഗാർത്ഥികൾക്ക് പിഎച്ച്‌ഡിക്ക് ശേഷം മൂന്ന് വർഷത്തിൽ താഴെ ഇൻഡസ്ട്രിയൽ, റിസർച്ച് അല്ലെങ്കിൽ ടീച്ചിംഗ് എക്സ്പീരിയൻസ് ഉണ്ടായിരിക്കണം. ഈ തസ്തികയിലെ ഏറ്റവും കുറഞ്ഞ അടിസ്ഥാന ശമ്പളം 98,200 രൂപ ആയിരിക്കും. ഇതോടൊപ്പം മറ്റ് അലവൻസുകളും ഉണ്ടായിരിക്കും. ഈ തസ്തികയിലേക്ക് തിരഞ്ഞെടുക്കപ്പെടുന്നവർക്ക് മൂന്ന് വർഷത്തെ എക്സ്പീരിയൻസ് ആയാൽ, ഒരു ഇന്റേണൽ അസസ്‌മെന്റ് പ്രക്രിയ വഴി അസിസ്റ്റന്റ് പ്രൊഫസർ ഗ്രേഡ് I തസ്തികയിലേക്കും പരിഗണിക്കുന്നതാണ്.

അപേക്ഷകരുടെ പ്രായം 35 വയസിൽ കൂടാൻ പാടില്ല. യോഗ്യത, പരിചയം, ഗവേഷണം, പ്രസിദ്ധീകരിച്ച പഠനങ്ങൾ, മറ്റ് അക്കാദമിക് യോ​ഗ്യതകൾ, എന്നിവയുടെ അടിസ്ഥാനത്തിൽ ഷോർട്ട്‌ലിസ്റ്റ് ചെയ്ത അപേക്ഷകരെ മാത്രമേ അഭിമുഖത്തിന് വിളിക്കൂ എന്നും ഐഐടി ഹൈദരാബാ​ദ് പ്രത്യേകം അറിയിച്ചിട്ടുണ്ട്. മതിയായ യോ​ഗ്യതകൾ ഇല്ലാത്തവരെ അഭിമുഖത്തിന് വിളിക്കില്ലെന്നും അധികൃതർ അറിയിച്ചു.