Covid 19 | മെഡിസിൻ പഠിച്ചത് വെറുതെയായില്ല; കോവിഡ് കാലത്ത് വീണ്ടും ആരോഗ്യപ്രവർത്തനത്തിന് ഇറങ്ങാൻ ഐറിഷ് പ്രധാനമന്ത്രി

പ്രാക്ടീസ് പരിധിയിലുള്ള മേഖലകളിൽ ആഴ്ചയിൽ ഒരു സെഷൻ വൈദ്യസേവനത്തിന് തയ്യാറാണെന്ന് അറിയിച്ചിരിക്കുകയാണ് ഡോ. വരദ്കർ എന്ന് അയർലൻഡ് ആരോഗ്യവിഭാഗം പ്രസ്താവനയിൽ പറഞ്ഞു.

2003 ൽ ഡബ്ലിനിലെ ട്രിനിറ്റി യൂണിവേഴ്സിറ്റിയിൽ നിന്ന് മെഡിക്കൽ ബിരുദം നേടിയ വരദ്കർ ഫോണിലൂടെ രോഗികളെ പരിശോധിക്കുകയും ചികിത്സ നിർദേശിക്കുകയും ചെയ്യുമെന്ന് ഐറിഷ് ടൈംസ് റിപ്പോർട്ട് ചെയ്തു.

ഒരു ഡോക്ടറുടെയും നഴ്സിന്റെയും മകനായി ജനിച്ച വരദ്കറുടെ ഭാര്യയും രണ്ട് സഹോദരിമാരും ആരോഗ്യ വിഭാഗത്തിലാണ് പ്രവർത്തിക്കുന്നത്.

പ്രധാനമന്ത്രിയുടെ കുടുംബാംഗങ്ങളും സുഹൃത്തുക്കളും കോവിഡ് 19 വ്യാപിക്കുന്ന പശ്ചാത്തലത്തിൽ ആരോഗ്യ സേവനത്തിൽ ജോലി ചെയ്യുന്നുണ്ടെന്ന് സർക്കാർ വക്താവ് വിശദീകരിച്ചു. ഇപ്പോഴത്തെ പ്രതിസന്ധിഘട്ടത്തിൽ രാജ്യത്തെ ആരോഗ്യമേഖലയിൽ സാധിക്കുന്ന രീതിയിൽ സഹായിക്കണമെന്ന ആഗ്രഹമാണ് ലിയോ വരാദ്കറിനുള്ളതെന്നും വക്താവ് കൂട്ടിച്ചേർത്തു.

ഇപ്പോൾ സർക്കാർ മുന്നോട്ടുവെച്ച റിക്രൂട്ട്മെന്‍റിനോട് 60,000 ത്തിലധികം പേർ സന്നദ്ധത അറിയിച്ചു. ആരോഗ്യ സേവനത്തെ സഹായിക്കാൻ വൈദ്യശാസ്ത്ര വിദഗ്ധരും ജനറൽ വോളന്റിയർമാരും കൂടുതലായി രംഗത്തുവരുന്നുണ്ട്.

ഞായറാഴ്ച പുറത്തുവിട്ട ഏറ്റവും പുതിയ കണക്കുകൾ പ്രകാരം അയർലണ്ടിൽ കൊറോണ വൈറസുമായി ബന്ധപ്പെട്ട് 158 മരണങ്ങൾ ഉണ്ടായിട്ടുണ്ട്.

രാജ്യത്ത് ഇതുവരെ ആകെ 4,994 കേസുകൾ സ്ഥിരീകരിച്ചതായി വകുപ്പ് അറിയിച്ചു.