ആറു വയസുകാരിയെ മദ്യം കുടിപ്പിച്ച കേസ്; പൊലീസിനെതിരെ ബാലാവകാശ സംരക്ഷണ കമ്മീഷൻ

കുട്ടിയെ പത്തു തവണയിൽ അധികം ചോദ്യം ചെയ്തുവെന്നും ബാലാവകാശ സംരക്ഷണനിയമങ്ങൾ തെറ്റിച്ച്  യൂണിഫോമിൽ പൊലീസ് എത്തിയെന്നുമുള്ള  കുട്ടിയുടെ അമ്മയുടെ പരാതി പരിഗണിച്ചാണ് നടപടി. കഴിഞ്ഞമാസം 24ന് എടത്തല പൊലീസ് സ്റ്റേഷനിലെ എസ് എച്ച് ഒയും സർക്കിൾ ഇൻസ്പെക്ടറും അടങ്ങുന്ന സംഘം രണ്ടു പൊലീസ് ജീപ്പിലായി എത്തിയെന്നു പരാതിയിൽ പറയുന്നു.

ഓഗസ്റ്റ് മാസം 29ന് വീണ്ടും പൊലീസ് എത്തി. എസ് എച്ച് ഒ മുഴുവൻ യൂണിഫോമിൽ മറ്റ് പൊലീസ് ഉദ്യോഗസ്ഥരുമായി വീട്ടിലെത്തി കുട്ടിയെ ചോദ്യം ചെയ്യുകയായിരുന്നു.

നാലു മണിക്കൂറോളം കുട്ടിയെ തനിച്ച് മുറിയിലിരുത്തി പൊലീസ് വേഷത്തിൽ സംഘം ചോദ്യം ചെയ്തതായി അമ്മയുടെ പരാതിയിലുണ്ട്.

ബാലസംരക്ഷണ നിയമമനുസരിച്ച് വനിതാപൊലീസ് സിവിൽ വേഷത്തിൽ സൗമ്യമായി കാര്യങ്ങൾ കുട്ടിയിൽ നിന്ന് മനസ്സിലാക്കുകയാണ് വേണ്ടത്. അതോടൊപ്പം പൊലീസ് സംഘത്തിന്റെ വരവ് കേസിലെ രഹസ്യസ്വഭാവം നഷ്ടപ്പെടുത്തി. ഇരയെ മറ്റുള്ളവർക്ക് കാണിച്ചുകൊടുക്കുന്ന രീതിയിലുള്ള പ്രവൃത്തി ആയിരുന്നുവെന്നും ആക്ഷേപമുണ്ട്. ഇത് രണ്ടും ബാലാവകാശ സംരക്ഷണ നിയമപ്രകാരം കുറ്റകരമാണ്. ഇതിന്റ അടിസ്ഥാനത്തിലാണ് രണ്ട് ഉദ്യോഗസ്ഥരെയും കമ്മീഷൻ വിളിച്ചു വരുത്തുന്നത്.