Life Mission | 'ഡോളർ വാങ്ങിയത് കരിഞ്ചന്തയിൽ നിന്ന്; ശിവശങ്കറെ കണ്ടത് കമ്മീഷൻ നൽകിയ ശേഷം': യുണിടാക് ഉടമയുടെ മൊഴി

കൊച്ചി: ലൈഫ് മിഷന്റെ വടക്കാഞ്ചേരിയിലെ ഫ്ലാറ്റ് നിർമ്മാണക്കരാർ ലഭിച്ചതിന് കമ്മീഷൻ നൽകാനുള്ള ഡോളർ വാങ്ങിയത് കരിഞ്ചന്തയിൽ നിന്നെന്ന് യുണിടാക് ഉടമ സന്തോഷ് ഈപ്പന്റെ മൊഴി. ബാങ്ക് ജീവനക്കാരുടെ സഹായത്തോടെ മൂന്നുലക്ഷം ഡോളര്‍ കൊച്ചിയില്‍ നിന്നും ഒരുലക്ഷം ഡോളർ തിരുവനന്തപുരത്തുനിന്നും വാങ്ങിയെന്നും സന്തോഷ് ഈപ്പന്‍ മൊഴിനല്‍കി . കമ്മീഷൻ സ്വപ്നയ്ക്ക് കൈമാറിയ ശേഷമാണ് മുഖ്യമന്ത്രിയുടെ പ്രിൻസിപ്പൽ സെക്രട്ടറിയായിരുന്ന എം. ശിവശങ്കറുമായുള്ള കൂടിക്കാഴ്ച തരപ്പെട്ടതെന്നും സന്തോഷ് ഈപ്പൻ എൻഫോഴ്സ്മെന്റ് ഡയറക്ടറേറ്റിനോട് വ്യക്തമാക്കിയിട്ടുണ്ട്.