Nipah| നിപ വരുമ്പോൾ പേടിക്കേണ്ടത് റമ്പൂട്ടാനേയോ വവ്വാലിനെയോ?

സംസ്ഥാനത്ത് ഇന്ന് ഏറ്റവും കൂടുതൽ കൃഷി ചെയ്യുന്ന പഴങ്ങളിലൊന്നാണ് റമ്പൂട്ടാൻ. ആദ്യം തൊടുപുഴ, റാന്നി, തിരുവല്ല, മൂവാറ്റുപുഴ, എരുമേലി ഭാഗങ്ങളിലാണ് ഏറ്റവും കൂടുതൽ കൃഷി ചെയ്തിരുന്നത്. ഇപ്പോൾ വയനാട്, കോഴിക്കോട്, കാസർകോട് ഭാഗങ്ങളിലും കൃഷി വ്യാപകമായിട്ടുണ്ട്. പരിപാലന ചെലവ് കുറവാണെന്നതും നല്ല ലാഭം നേടാനാകും എന്നതുമാണ് കർഷകരെ റമ്പൂട്ടാൻ കൃഷിയിലേക്ക് തിരിയാൻ പ്രേരിപ്പിച്ചത്.

150 കിലോ വരെ വിളവ് നൽകുന്ന റമ്പുട്ടാൻ ചെടികൾ നിലവിലുണ്ട്. എന്തായാലും ചെടിയൊന്നിന് ശരാശരി 30 കിലോ ഉറപ്പ്. ഒരു കിലോ റമ്പുട്ടാന് വിപണിയിൽ 220–240 രൂപയാണ് വില. 200 രൂപ എന്നു കണക്കാക്കിയാൽ പോലും 6000 രൂപ ഒരു ചെടിയിൽനിന്ന് പ്രതിവർഷം ലഭിക്കും. ഒരു ഏക്കർ തോട്ടമുള്ള കർഷകന് വർഷം 7 ലക്ഷത്തിന്റെ അടുത്ത് വരവ് ഉണ്ടാകും. മറ്റ് വിളകളെ പോലെ പരിപാലനത്തിന് കാര്യമായ പണചെലവുമില്ല.

ഏറെ പ്രതീക്ഷയോടെയാണ് മറ്റു വിളകളെല്ലാം ഉപേക്ഷിച്ച് റമ്പൂട്ടാൻ കൃഷിയിലേക്ക് പലരും തിരിഞ്ഞത്. എന്നാൽ നിപയുടെ വരവ് കർഷകരെ കടുത്ത ആശങ്കയിലാക്കിയിരിക്കുകയാണ്. എന്നാൽ റമ്പൂട്ടാനും നിപയ്ക്കും ബന്ധമൊന്നുമില്ല എന്നതാണ് വാസ്തവം. കേരളത്തിൽ കൃഷി വ്യാപകമായതുകൊണ്ട് വവ്വാലിന് ഏറ്റവും എളുപ്പം ലഭിക്കുന്നത് റമ്പൂട്ടാൻ തന്നെ.

റമ്പൂട്ടാന്റെ പുതിയ പേരാണ് കൊറോണ പഴം. കാഴ്ചയിൽ കൊറോണ വൈറസിന്റെ രൂപമുളളതിനാലാണ് ഇങ്ങനെ പേരുവീണത്. വിയറ്റ് നാം, ഇന്തോനീഷ്യ, ഫിലിപ്പീൻസ്, ശ്രീലങ്ക, മലേഷ്യ എന്നീ പ്രദേശങ്ങളിലെ ഭൂപ്രകൃതിയാണ് റമ്പുട്ടാൻ കൃഷിക്ക് അനുയോജ്യം, 22–30 ഡിഗ്രി ചൂടിൽ സമൃദ്ധിയായി വളരും. തൈ നട്ടാൽ ആദ്യ മൂന്നു വർഷം നല്ല തണൽ വേണം. പിന്നീട് നല്ല വെയിലും. അതുകൊണ്ടുതന്നെ വാഴത്തോപ്പുകളിൽ പറ്റിയ കൃഷിയാണ്. ‘റമ്പൂട്ട്’ എന്ന മലയൻ പദത്തിൽനിന്നാണ് റമ്പുട്ടാന് ആ പേരു കിട്ടിയത്. റമ്പുട്ട് എന്നാൽ രോമാവൃതം.

കോവിഡ് കാലത്തെ കടുത്ത സാമ്പത്തിക പ്രതിസന്ധിക്കിടയിൽ ഒട്ടേറെ കർഷകരുടെ ജീവിത പ്രതീക്ഷയായിരുന്നു റമ്പൂട്ടാൻ മരങ്ങൾ. നല്ല രീതിയിൽ വല കൊണ്ടു മൂടിത്തന്നെ എല്ലാ മരങ്ങളും അവർ സംരക്ഷിക്കുകയും ചെയ്തിട്ടുണ്ട്. കേരളത്തിൽ റമ്പുട്ടാൻ പഴങ്ങളെല്ലാം നിപ്പ പരത്തുന്നതാണ് എന്ന തെറ്റായ ധാരണ ആർക്കും പാടില്ലെന്നാണ് കർഷകരുടെയും കച്ചവടക്കാരുടെയും അഭ്യർത്ഥന.

കോഴിക്കോട് മെഡിക്കല്‍ കോളേജിലെ മുന്‍ പ്രൊഫസറും ശാസ്ത്ര രചയിതാവുമായ ഡോ. കെ പി അരവിന്ദൻ ഫേസ്ബുക്കിൽ കുറിച്ചത് ഇങ്ങനെ- ''കോഴിക്കോട്ട് മാർക്കറ്റുകളിൽ ഇപ്പോൾ റമ്പൂട്ടാൻ ആരും വാങ്ങുന്നില്ലത്രെ. ഇത് തെറ്റിദ്ധാരണ മൂലമാണ്. മാർക്കറ്റുകളിൽ കിട്ടുന്ന ഫലങ്ങൾ തികച്ചും സുരക്ഷിതമാണ്. വവ്വാലുകൾ കടിച്ചിട്ട ഫലങ്ങളിൽ നിന്ന് രോഗം പകരണമെങ്കിൽ അതിന്റെ ഉമിനീർ മുഴുവനായി ഉണങ്ങുന്നതിനു മുൻപ് അത് എടുത്ത് കഴിക്കുകയോ അതെടുത്ത കൈ കഴുകാതെ വായിലേക്കോ മറ്റോ കൊണ്ടു പോവുകയോ വേണം. ഉമിനീർ ഉണങ്ങിക്കഴിഞ്ഞാൽ വൈറസിന് പുറത്ത് അധിക സമയം ജീവിക്കാനാവില്ല. പല മണിക്കൂറുകളോ ദിവസങ്ങളോ കഴിഞ്ഞ് മാർക്കറ്റിൽ എത്തുന്ന ഫലങ്ങളിൽ വൈറസിന്റെ ഒരു സാന്നിധ്യവും ഉണ്ടാവില്ല.