ഓൺലൈൻ ഡെലിവറിയെന്ന വ്യാജേന ഒടിപി തട്ടിപ്പ്; വഞ്ചിക്കപ്പെടാതിരിക്കാൻ ശ്രദ്ധിക്കേണ്ട കാര്യങ്ങൾ

ഓൺലൈൻ ഡെലിവറിയെന്ന വ്യാജേന നിങ്ങളുടെ കയ്യിൽ നിന്നും ഒടിപി ചോദിച്ച് വാങ്ങി വൻ തട്ടിപ്പുകൾ ഇപ്പോൾ പലയിടത്തും നടക്കുന്നുണ്ട്. തെലങ്കാനയിലെ സൈബറാബാദ് പോലീസിന് കീഴിലെ സൈബർ വിങ് ഇതുമായി ബന്ധപ്പെട്ട് ജനങ്ങളെ ബോധവൽക്കരിച്ച് വരികയാണ്.

നിങ്ങൾ ഓൺലൈനിൽ ഓർഡർ ചെയ്തിട്ടുണ്ടെന്നും അത് തരാനായി എത്തിയിരിക്കുകയാണെന്നും പറഞ്ഞ് ഡെലിവറി ഏജൻറ് നിങ്ങളുടെയോ കുടുംബാംഗങ്ങളുടെയോ അടുത്തെത്തിയേക്കും. ഓൺലൈൻ തട്ടിപ്പിനെക്കുറിച്ച് വ്യക്തമായ ധാരണയില്ലാത്തവരെയും പ്രായമായവരെയും ഇത്തരത്തിൽ പറ്റിക്കാൻ വളരെ എളുപ്പമാണ്.

നിങ്ങളുടെ ഓർഡർ കൈമാറണമെങ്കിൽ മൊബൈലിൽ വന്നിട്ടുള്ള ഒടിപി നൽകണമെന്നായിരിക്കും ഡെലിവറി ഏജൻറ് പറയുക. നിങ്ങൾ ഇങ്ങനെ ഒരു ഓർഡർ നൽകിയിട്ടില്ലെന്നും അതിനാൽ ഒടിപി നൽകേണ്ട കാര്യമില്ലെന്നും പറഞ്ഞാൽ തട്ടിപ്പുകാരനായ ഏജൻറ് മറ്റൊരു വഴിനോക്കും. ഓർഡർ ക്യാൻസൽ ചെയ്യാനായി ഒടിപി ഷെയർ ചെയ്യണമെന്നായിരിക്കും അവർ ആവശ്യപ്പെടുക. ഏതെങ്കിലും വിധേന നിങ്ങളിൽ നിന്ന് ഒടിപി കൈക്കലാക്കാൻ വേണ്ടിയായിരിക്കും അവരുടെ ശ്രമം.

അപരിചിതരായ ഇത്തരക്കാർക്ക് ഒടിപി കൈമാറിയാൽ നിങ്ങൾ വലിയ കുഴപ്പത്തിലായിരിക്കും ചെന്ന് ചാടുക. മൊബൈലിൽ നിന്നും ഒടിപി കൈമാറുന്നതിലൂടെ തട്ടിപ്പുകാർക്ക് നിങ്ങളുടെ സാമ്പത്തിക കാര്യങ്ങളുമായി ബന്ധപ്പെട്ട വിവരങ്ങൾ ലഭ്യമാവും. അങ്ങനെ തട്ടിപ്പ് നടത്താൻ എളുപ്പമാവുകയും കയ്യിൽ നിന്ന് പണം നഷ്ടമാവുകയും ചെയ്യും.