Explained: പുതിയ സഹകരണ മന്ത്രാലയത്തിലൂടെ കേന്ദ്രം ലക്ഷ്യമിടുന്നതെന്ത്? പൊതുജനങ്ങൾക്ക് എങ്ങനെ സഹായകമാകും

പത്തൊൻപതാം നൂറ്റാണ്ടിൽ യൂറോപ്പിൽ വേരുകളുള്ള സഹകരണ പ്രസ്ഥാനങ്ങൾ കാർഷിക ദുരിതത്തിനും കടബാധ്യതയ്ക്കും മറുപടിയായി സ്വാതന്ത്ര്യത്തിനു മുമ്പ് തന്നെ ഇന്ത്യയിൽ ആരംഭിച്ചിരുന്നു. എന്നാൽ 1904ൽ സഹകരണ സംഘ നിയമം പ്രാബല്യത്തിൽ വന്നതോടെയാണ് സഹകരണ പ്രസ്ഥാനത്തിന് ഔപചാരികമായി തുടക്കം കുറിച്ചതെന്ന് സ്റ്റാറ്റിസ്റ്റിക്സ് ആൻഡ് പ്രോഗ്രാം ഇംപ്ലിമെന്റേഷൻ മന്ത്രാലയം അഭിപ്രായപ്പെട്ടു.

കാർഷിക മേഖലയെയും അനുബന്ധ പ്രവർത്തനങ്ങളെയും ആശ്രയിക്കുന്ന രാജ്യത്തെ ജനസംഖ്യയുടെ 65 ശതമാനത്തോളം വരുന്ന ജനതയുടെ പ്രയോജനത്തിനായാണ് സഹകരണ സംഘങ്ങൾ പ്രവർത്തിക്കുന്നത്. 1912ലെ സഹകരണ സൊസൈറ്റി ആക്റ്റ് അനുസരിച്ച്, കൃഷി, നെയ്ത്ത്, ഉപഭോഗം തുടങ്ങിയ പൊതു സാമ്പത്തിക ലക്ഷ്യങ്ങളുള്ള 18 വയസ്സിന് മുകളിലുള്ള 10 വ്യക്തികൾക്ക് ചേർന്ന് ഒരു സഹകരണ സംഘം രൂപീകരിക്കാൻ കഴിയും.

പുതിയ മന്ത്രാലയത്തിന്റെ ആരംഭത്തെ 'ചരിത്രപരമായ നീക്കം' എന്ന് വിശേഷിപ്പിച്ച കേന്ദ്രം, സഹകരണത്തിലൂടെ സമൃദ്ധി എന്നതാണ് മന്ത്രാലയത്തിന്റെ ലക്ഷ്യമെന്ന് വ്യക്തമാക്കി. "സഹകരണ പ്രസ്ഥാനത്തെ ശക്തിപ്പെടുത്തുന്നതിന് പ്രത്യേക ഭരണ, നിയമ, നയ ചട്ടക്കൂട് നൽകാൻ" മന്ത്രാലയം ശ്രമിക്കുമെന്നാണ് നിരീക്ഷകരുടെ വിലയിരുത്തൽ. സഹകരണ സ്ഥാപനങ്ങൾക്കായി ‘ബിസിനസ്സ് എളുപ്പമാക്കുന്നതിനുള്ള’ പ്രക്രിയകൾ മന്ത്രാലയം സുഗമമാക്കുകയും ഇതര സംസ്ഥാന സഹകരണസംഘങ്ങളുടെ വികസനം പ്രാപ്തമാക്കുകയും ചെയ്യുമെന്നുമാണ് വിവരം.