ഖത്തർ അമീർ മെസിയെ 'ബിഷ്ത്' അണിയിച്ചത് എന്തുകൊണ്ട്?

അറബികളുടെ പരമ്പരാഗത വസ്ത്രമായ വെളുത്ത നീളം കൂടിയ  ‘തൗബ്’ ന് മുകളിലായി ധരിക്കുന്ന നീണ്ട മേലങ്കിയാണ് ബിഷ്ത്. അറബികളുടെ ചിറകെന്നാണ് സ്വർണനൂലുകളിൽ നിർമിച്ച ഈ വേഷം വിശേഷിപ്പിക്കപ്പെടുന്നത്. ഔദ്യോഗികമായ ചടങ്ങുകൾക്കും ഈദ് പോലുള്ള ആഘോഷങ്ങൾക്കും ബിഷ്ത് ധരിച്ച അറബ് ഭരണാധികാരികളെ വാർത്തകളിൽ കാണാം.

ഗവർണർമാർ, മന്ത്രിമാർ, മുതിർന്ന ഉദ്യോഗസ്ഥർ, രാഷ്ട്രീയ നേതാക്കൾ, മത നേതാക്കൾ, വെള്ളിയാഴ്ച പ്രാർഥനകളിൽ പള്ളികളിലെ ഇമാമുമാർ തുടങ്ങി രാജ്യത്തെ പൗര പ്രമുഖരാണ് ഈ വസ്ത്രം ധരിക്കുക. നൂറ്റാണ്ടുകളായി അറേബ്യയിൽ ആദരവിന്റേയും അംഗീകാരത്തിന്റേയും അടയാളമാണ് ബിഷ്ത്. ഈ വസ്ത്രമാണ് ഖത്തർ അമീർ ഫുട്ബോളിന്റെ മിശിഹയെ അണിയിച്ചത്.

രാജകുടുംബാംഗങ്ങളും വിശിഷ്ട വ്യക്തികളും ധരിക്കുന്ന വേഷമാണ് ബിഷ്തെന്ന് എക്സെറ്റർ സർവകലാശാലയിലെ ഇസ്ലാമിക് സ്റ്റഡീസ് അധ്യാപകനായ മുസ്തഫ ബെയ്ഗ് പറയുന്നു. വിശിഷ്ട വ്യക്തികൾക്ക് മാത്രം ലഭിക്കുന്ന വസ്ത്രം. ഖത്തർ അമീർ മെസിയുടെ തോളിൽ ബിഷ്ത് അണിയിച്ചതിലൂടെ അദ്ദേഹത്തെ ആദരിക്കുകയാണ് ചെയ്തത്. സാംസ്കാരിക സ്വാഗതവും സാംസ്കാരിക സ്വീകാര്യതയുമാണ് ഇത് അർത്ഥമാക്കുന്നതെന്നും മുസ്തഫ ബെയ്ഗ് ചൂണ്ടിക്കാട്ടുന്നു. പ്രത്യേക അവസരങ്ങളിൽ മാത്രം ധരിക്കുന്ന ഖത്തറിന്റെ ദേശീയ വസ്ത്രത്തിന്റെ സൂചകമാണ് ഇതെന്നും അദ്ദേഹം പറയുന്നു.