യുനെസ്‌കോയില്‍ വീണ്ടും അംഗമാകാനൊരുങ്ങുന്ന അമേരിക്ക സംഘടനയില്‍ നിന്ന് വിട്ടുനിന്നത് എന്തുകൊണ്ട്?

യുനെസ്‌കോ എന്ന ആഗോള സംഘടനയുടെ സഹസ്ഥാപക അംഗങ്ങളിൽ ഒരാളായിരുന്നു അമേരിക്ക. 2011വരെ യുനെസ്‌കോയുടെ ബജറ്റില്‍ ഏറ്റവും കൂടുതല്‍ സംഭാവന നല്‍കിയ രാജ്യവും അമേരിക്കയാണ്. എന്നാല്‍ 2011ല്‍ പാലസ്തീന് യുനെസ്‌കോ അംഗത്വം നല്‍കിയതോടെയാണ് കാര്യങ്ങള്‍ വഷളായത്.യുനെസ്‌കോയുടെ ഈ തീരുമാനം അമേരിക്കയ്ക്ക് സ്വീകാര്യമായിരുന്നില്ല. വര്‍ഷം തോറും 75 മില്യണ്‍ ഡോളറാണ് അമേരിക്ക യുനെസ്‌കോയ്ക്ക് സാമ്പത്തിക സഹായമായി നല്‍കിയിരുന്നത്.

ഇതാദ്യമായല്ല യുനെസ്‌കോയില്‍ നിന്ന് അമേരിക്ക വിട്ടുനില്‍ക്കുന്നത്. 1984ലാണ് ആദ്യമായി അമേരിക്ക യുനെസ്‌കോയില്‍ നിന്ന് പിന്‍മാറുന്നതായി പ്രഖ്യാപിച്ചത്. റൊണാള്‍ഡ് റീഗനായിരുന്നു അന്നത്തെ അമേരിക്കന്‍ പ്രസിഡന്റ്. സംഘടനയ്ക്കുള്ളില്‍ അഴിമതി നടക്കുന്നുവെന്നും സോവിയറ്റ് താല്‍പ്പര്യങ്ങളെ പിന്താങ്ങുന്നുവെന്നുമാരോപിച്ചായിരുന്നു അന്നത്തെ പിന്‍മാറ്റം. അതേസമയം യുഎസ് – യുനെസ്‌കോ ബന്ധം കഴിഞ്ഞ നാലു പതിറ്റാണ്ടായി വളരെ പ്രക്ഷുബ്ധമായ നിലയിലാണ്. ശീതയുദ്ധ കാലം മുതലാണ് ഈ സംഘര്‍ഷം ആരംഭിച്ചത്. ഇസ്രായേല്‍-പലസ്തീന്‍ തര്‍ക്കം യുനെസ്‌കോ-യുഎസ് ബന്ധത്തെയും ബാധിച്ചിരുന്നു.

ചൈനയുടെ സ്വാധീനം കുറയ്ക്കുകയെന്ന ലക്ഷ്യം മുന്നില്‍ കണ്ടാണ് യുഎസ് യുനെസ്‌കോയിലേക്ക് തിരിച്ചുവരാനൊരുങ്ങുന്നത് എന്നാണ് ചില വൃത്തങ്ങള്‍ നല്‍കുന്ന സൂചന. അമേരിക്കയുടെ സ്ഥാനം ചൈന കൈയ്യേറുമോയെന്ന ഭയമാണ് തിരിച്ചുവരാന്‍ അമേരിക്കയ്ക്ക് പ്രചോദനമായതെന്നാണ് റിപ്പോര്‍ട്ടുകൾ നൽകുന്ന സൂചന.അമേരിക്ക പിന്‍മാറിയതോടെ ചൈനയുടെ സ്വാധീനം വര്‍ധിച്ചു. അത് ആര്‍ട്ടിഫിഷ്യല്‍ ഇന്റലിജന്‍സുമായി ബന്ധപ്പെട്ട നയരൂപീകരണത്തിന് മുന്‍കൈയെടുക്കാന്‍ അവരെ സഹായിക്കുമെന്ന് യുഎസ് വിദേശകാര്യ സെക്രട്ടറി ആന്റണി ബ്ലിങ്കണ്‍ പറഞ്ഞു.

തിരിച്ചുവരാനുള്ള അമേരിക്കയുടെ തീരുമാനം യുനെസ്‌കോയ്ക്ക് അനുഗ്രഹമാകുമെന്നാണ് കരുതുന്നത്. യുനെസ്‌കോയുടെ പാരീസ് ആസ്ഥാനത്ത് നടന്ന യോഗത്തില്‍ ഇക്കാര്യം അവതരിപ്പിക്കുകയും ചെയ്തിരുന്നു. അമേരിക്കയുടെ തിരിച്ചുവരവില്‍ ആരും എതിര്‍പ്പ് രേഖപ്പെടുത്തിയിട്ടില്ല.”യുനെസ്‌കോയുടെ വിശ്വാസ്യത വര്‍ധിപ്പിക്കുന്ന തീരുമാനമാണിത്. അതിലൂടെ ബഹുസ്വരതയും നിലനിര്‍ത്താനാകും,” എന്ന് ഡയറക്ടര്‍ ജനറല്‍ ഓഡ്രി അസോളെ പറഞ്ഞു.

പലസ്തീന്‍ വിഷയത്തെ അഭിസംബോധന ചെയ്യാന്‍ അമേരിക്ക ഇപ്പോഴും തയ്യാറായിട്ടില്ല. യുനെസ്‌കോയിലെ അംഗം കൂടിയാണ് പലസ്തീന്‍. പലസ്തീന്‍-ഇസ്രായേല്‍ സംഘര്‍ഷവും ഇപ്പോഴും മാറ്റമില്ലാതെ തുടരുന്നു. ഇരു രാജ്യങ്ങളും തമ്മില്‍ കഴിഞ്ഞ ഒരു പതിറ്റാണ്ടായി സമാധാന ചര്‍ച്ചകളും നടന്നിട്ടില്ല. ഇസ്രായേലിലെ പുതിയ ഭരണകൂടം പലസ്തീന്‍ ആവശ്യത്തെ പൂര്‍ണ്ണമായി എതിര്‍ക്കുകയാണ്. അതേസമയം പലസ്തീന്‍, ജോര്‍ദാനിയന്‍, ഇസ്രയേല്‍ നയതന്ത്ര പ്രതിനിധികള്‍ക്കിടയില്‍ അഭിപ്രായ ഐക്യം വളര്‍ത്തിയെടുക്കാന്‍ ശ്രമിച്ചയാളാണ് യുനെസ്‌കോ അധ്യക്ഷയായ ഓഡ്രി അസോളെ.