'കന്മഷമില്ലാത്ത, കാലുഷ്യമില്ലാത്ത, കലർപ്പില്ലാത്ത മനുഷ്യൻ;'സിദ്ദിഖിനെകുറിച്ച് ബി. ഉണ്ണികൃഷ്ണൻ

പരിഹാസത്തിന്റെയോ, വിദ്വേഷത്തിന്റെയോ അല്ല, കണ്ണീരിന്റെ ധാതുഗുണമായിരുന്നു സിദ്ദിഖിയൻ ചിരിയുടെ അകകാമ്പിന്. സിദ്ദിഖിന്റെ കീഴടക്കലുകൾ ആക്രമോത്സുകങ്ങളായിരുന്നില്ല. അവ സ്നേഹത്തിന്റേയും സഹനത്തിന്റേയും സൗഹൃദത്തിന്റെയും വ്യാപനമായിരുന്നു. ഒരിക്കലും ഉടയാത്ത സൗമ്യതയായിരുന്നു സിദ്ദിഖ്. കന്മഷമില്ലാത്ത, കാലുഷ്യമില്ലാത്ത, കലർപ്പില്ലാത്ത മനുഷ്യനായിരുന്നു സിദ്ദിഖ്. അങ്ങനെയാവുക, അങ്ങനെ ജീവിക്കുക ഒട്ടും എളുപ്പമല്ല. അങ്ങനെയൊരു ജീവിതം ഋജുവായി ജീവിച്ചു തീർത്ത എന്റെ പ്രിയപ്പെട്ട സിദ്ദിഖ്, നിങ്ങൾ അവശേഷിപ്പിച്ചതെല്ലാം ഞങ്ങൾക്കൊപ്പമുണ്ടാവും, എന്നും. ചിരിച്ചാണ് നിങ്ങളെ യാത്രയാക്കേണ്ടത്. പക്ഷേ, ഞങ്ങൾക്കതിനു കഴിയുന്നില്ല, ക്ഷമിക്കുക. വിട, പ്രിയ സുഹൃത്തേ…