'കാന്താരാ'യുടെ വന്‍ വിജയത്തിന് പിന്നാലെ ഋഷഭ് ഷെട്ടി രാഷ്ട്രീയത്തിലേക്ക് ? പ്രതികരിച്ച് താരം

ദക്ഷിണ കന്നടയിലെ പഞ്ചുരുളി ദൈവക്കോലത്തിന്‍റെ കഥപറഞ്ഞ കാന്താരയിലൂടെ നായകനും സംവിധായകനുമായ ഋഷഭ് ഷെട്ടിയ്ക്ക് ഇന്ത്യയൊട്ടാകെ നിരവധി ആരാധകരെ സ്വന്തമാക്കിയിരുന്നു. ഇതിനിടെ താരം രാഷ്ട്രീയത്തിലേക്കിറങ്ങുമെന്ന പ്രചരണവും കര്‍ണാടകയില്‍ ശക്തമായിരുന്നു. അടുത്തിടെ കേന്ദ്ര ആഭ്യന്തരമന്ത്രി അമിത് ഷാ സിനിമ കണ്ട ശേഷം കാന്താരയെയും ദക്ഷിണ കന്നടയുടെ സംസ്കാരത്തെയും പുകഴ്ത്തി സംസാരിച്ചിരുന്നു.

ഇതിനിടെ, തന്‍റെ രാഷ്ട്രീയ പ്രവേശനത്തെ കുറിച്ച് നടന്‍ ഋഷഭ് ഷെട്ടി തന്നെ പ്രതികരിച്ചു. താന്‍ രാഷ്ട്രീയത്തിലിറങ്ങുമെന്നും തെരഞ്ഞെടുപ്പില്‍ മത്സരിക്കുമെന്ന പ്രചാരണം താരം തള്ളി. താന്‍ രാഷ്ട്രീയത്തിലേക്കിറങ്ങാന്‍ ആഗ്രഹിക്കുന്നില്ലെന്നും സമൂഹത്തിലെ മാറ്റം രാഷ്ട്രീയത്തില്‍ നിന്നാകണമെന്നില്ലെന്നും താരം പ്രതികരിച്ചു.

തെരഞ്ഞെടുപ്പില്‍ മത്സരിക്കാന്‍ ആരെങ്കിലും സമീപിച്ചിരുന്നോ എന്ന ചോദ്യത്തിന് മൂന്ന് പാര്‍ട്ടികളും തനിക്ക് സീറ്റ് വാഗ്ദാനം ചെയ്തെന്നാണ് താരം തമാശയായി പറഞ്ഞത്,.