ആർഭാടങ്ങളും ബഹളങ്ങളും ഇല്ല; നടൻ ആൻസൺ പോൾ തിരുവല്ലാക്കാരി നിധിയെ രജിസ്ട്രാർ ഓഫീസിൽ വച്ച് താലിചാർത്തി

മലയാള സിനിമയിൽ പ്രേക്ഷകരുടെ ശ്രദ്ധയാർജ്ജിച്ച യുവതാരമായ ആൻസൻ, തന്റെ ജീവിതത്തിലെ ഏറ്റവും പ്രധാനപ്പെട്ട ദിവസത്തെയും ലളിതമായി ആഘോഷിക്കാൻ തീരുമാനിക്കുകയായിരുന്നു.

മലയാളത്തിന്റെ നൂറുകോടി തിളക്കമായ 'മാർക്കോ' എന്ന ചിത്രത്തിൽ ആൻസൻ പോൾ ശ്രദ്ധേയമായ വേഷം കൈകാര്യം ചെയ്തിരുന്നു. ആ വേഷം താരത്തിന്റെ അഭിനയജീവിതത്തിൽ നിർണായകമായി. മാർക്കോയിലൂടെയും അതിന് മുമ്പ് എബ്രഹാമിന്റെ സന്തതികൾ, ആട് 2, സോളോ, റാഹേൽ മകൻ കോര തുടങ്ങിയ മലയാള സിനിമകളിലും, തമിഴ് സൂപ്പർഹിറ്റ് ചിത്രമായ റെമോയിലെയും ശ്രദ്ധേയമായ വേഷങ്ങൾ ആൻസൻ പോൾ കൈകാര്യം ചെയ്തിരുന്നു.

അടുത്തിടെ നടൻ വിഷ്ണു ഗോവിന്ദനും തന്റെ വിവാഹം ലളിതമാക്കിയിരുന്നു. ചേർത്തല സബ്-റജിസ്ട്രർ ഓഫീസിൽ വച്ച് വിഷ്ണുവും അഞ്ജലി ഗീതയും വിവാഹിതരാവുകയായിരുന്നു. രണ്ടു ദിവസങ്ങൾക്ക് മുൻപായിരുന്നു വിഷ്ണു ഗോവിന്ദന്റേയും ഗീതയുടെയും വിവാഹം.

മലയാള സിനിമാ ലോകത്ത് ഒരു മികച്ച നടനെന്ന നിലയിൽ തന്റെ സ്ഥാനമുറപ്പിച്ചു കൊണ്ടിരിക്കുന്ന ആൻസൺ പുതിയ ജീവിതത്തിലേക്ക് കാലെടുത്തു വെക്കുമ്പോൾ ആരാധകരും മറ്റുള്ളവരും സാമൂഹ്യമാധ്യമങ്ങളിലൂടെയും അല്ലാതെയും ആശംസകൾ നേർന്നു.