L2 Empuraan: വരവറിയിച്ച് ഖുറേഷി അബ്രാം; ആവേശമായി എമ്പുരാൻ ട്രെയ്‌ലർ

മലയാളി സിനിമാ പ്രേമികൾ ആവേശത്തോടെ കാത്തിരിക്കുന്ന ചിത്രമാണ് മോഹൻലാൽ നായകനായി എത്തുന്ന എമ്പുരാൻ. പൃഥ്വിരാജ് സുകുമാരൻ സംവിധാനം നിർവഹിക്കുന്ന ചിത്രത്തിന്റെ ട്രെയ്‌ലർ പുറത്തുവിട്ടിരിക്കുകയാണ് അണിയറപ്രവർത്തകർ. രാത്രി 12 മണിക്കാണ് ചിത്രത്തിന്‍റെ മലയാളം ട്രെയ്ലർ യൂട്യൂബിൽ റിലീസ് ആയത്. ഹിന്ദി, തമിഴ്, തെലുങ്ക്, കന്നഡ ഭാഷകളിലേയും ട്രെയ്ലര്‍ പുറത്തുവന്നു. ഇന്ന് ഉച്ചക്ക് 1:08നാണ് ട്രെയിലർ പുറത്തിറക്കുമെന്ന് ആദ്യം തീരുമാനിച്ചിരുന്നത്. എന്നാൽ സർപ്രൈസായി ട്രെയ്ലർ പുറത്തുവിടുകയായിരുന്നു. ട്രെയ്ലർ ചോർന്നതാണ് ഇതിനു കാരണമെന്ന തരത്തിലുള്ള വാർത്തകളും പുറത്തുവരുന്നുണ്ട്. ലൈക്ക പ്രൊഡക്ഷൻസ്, ആശീർവാദ് സിനിമാസ്, ശ്രീ ഗോകുലം മൂവീസ് നിർമിച്ച എമ്പുരാൻ മാർച്ച് 27നാണ് തിയറ്ററുകളിൽ എത്തുക.