മലയാളത്തിലെ ഏറ്റവും നീണ്ട ടെലിവിഷൻ പരമ്പരയായി ഏഷ്യാനെറ്റിലെ 'മൗനരാഗം'; അഞ്ചു വർഷം കൊണ്ട് 1526 എപ്പിസോഡുകൾ

ഇത്രയും കാലം ഈ റെക്കോർഡ് സ്വന്തമാക്കിയിരുന്നത് മഴവിൽ മനോരമയുടെ 'മഞ്ഞിൽ വിരിഞ്ഞ പൂവ്' എന്ന പരമ്പരയാണ്. ആകെ ഒരു എപ്പിസോഡിന്റെ കുറവിലാണ് ഈ പരമ്പരയ്ക്ക് രണ്ടാം സ്ഥാനത്തേക്ക് വഴിമാറേണ്ടി വന്നത്. മാളവിക വെയിൽസ് കേന്ദ്രകഥാപാത്രത്തെ അവതരിപ്പിച്ചിരുന്ന പരമ്പരയായിരുന്നു ഇത്. 2019 മാർച്ച് നാലിനാരംഭിച്ച പരമ്പര, 2024 ജൂലൈ 21 വരെ പ്രക്ഷേപണം തുടർന്നിരുന്നു. മൂന്നാം സ്ഥാനവും ഏഷ്യാനെറ്റിലെ പരമ്പരയ്ക്ക് തന്നെ. പടിപ്പുര വീട്ടിൽ പത്മാവതിയുടെയും ദീപ്തി ഐ.പി.എസിന്റെയും കഥയുമായെത്തിയ കുടുംബ പരമ്പര 1,524 എപ്പിസോഡുകൾ തികച്ചു. 2013 ജൂലൈ 22ന് ആരംഭിച്ച പരമ്പര 2018 ഓഗസ്റ്റ് 31 വരെ നീണ്ടു. രേഖ രതീഷ്, ഗായത്രി അരുൺ, വിവേക് ഗോപൻ എന്നിവരായിരുന്നു തുടക്കം മുതൽ അവസാനം വരെയും ഈ സീരിയലിലെ പ്രധാന കഥാപാത്രങ്ങളെ കൈകാര്യം ചെയ്തത്.

ദീർഘകാലം പ്രക്ഷേപണം ചെയ്ത ടെലിവിഷൻ പരമ്പര എന്ന വിശേഷണം ആദ്യമായി ലഭിച്ചതും ഏഷ്യാനെറ്റിനായിരുന്നു. ഫിലോമിന, സിദ്ധിഖ്, വിനയ പ്രസാദ്, യവനിക ഗോപാലകൃഷ്ണൻ, പ്രഗതി, കൃഷ്ണകുമാർ എന്നിവർ അഭിനയിച്ച 'സ്ത്രീ' സീരീസ് പരമ്പര ഓടിയത് ഒന്നും രണ്ടുമല്ല, നീണ്ട എട്ടു വർഷക്കാലമായിരുന്നു. ഇത്രയും നാളുകളിൽ ഈ പരമ്പര 1,493 എപ്പിസോഡുകൾ തികച്ചു. 1998 ഡിസംബർ 21 മുതൽ 2007 ജനുവരി 12 വരെയായിരുന്നു ഈ പരമ്പരയുടെ കാലം. മൂന്നു സീരീസുകളായി എത്തിയ പരമ്പരയിൽ അഭിനേതാക്കളും മാറിമാറി വന്നിരുന്നു. ഒരു കഥാപാത്രത്തിന് തന്നെ ഒന്നിലേറെ അഭിനേതാക്കൾ കാലക്രമേണ മാറിവരുന്ന ട്രെന്റിന് സാക്ഷ്യം വഹിച്ച പരമ്പര കൂടിയായിരുന്നു ഇത്.

'മൗനരാഗം' ഏഷ്യാനെറ്റിൽ തിങ്കൾ മുതൽ ശനി വരെ വൈകുന്നേരം 6 മണിക്ക് സംപ്രേക്ഷണം ചെയ്യുന്നു.