Happy Birthday Prakash Raj | അഞ്ച് ദേശീയ പുരസ്കാരങ്ങൾ നേടിയ അഭിനയപ്രതിഭ; പ്രകാശ് രാജിന് ഇന്ന് 56-ാം പിറന്നാൾ

1965 മാർച്ച് 26 ന് ബംഗളൂരുവിലാണ് പ്രകാശ് രാജ് ജനിച്ചത്. കന്നഡ സ്റ്റേജ് ഷോകളിലും സീരിയലികളിലുമായി അഭിനയ ജീവിതം തുടങ്ങിയ അദ്ദേഹത്തിന്‍റെ കരിയറിലെ ബിഗ് ബ്രേക്ക് കന്നഡ ചിത്രമായ 'ഹരാകേയ കുരി'യാണ്. 1994 ൽ കെ.ബാലചന്ദറിന്‍റെ ഡ്യുയറ്റ് എന്ന ചിത്രത്തിലൂടെയാണ് തമിഴ് സിനിമാ രംഗത്തേക്ക് കടന്നത്. ക്രമേണ തെന്നിന്ത്യന്‍ ചിത്രങ്ങളിലെ തിരക്കേറിയ താരമായി പ്രകാശ് രാജ്. അഞ്ച് ദേശീയ അവാർഡുകൾ, എട്ട് തമിഴ് സംസ്ഥാന ചലച്ചിത്ര അവാർഡുകൾ എന്നിവ ഉൾപ്പെടെ എണ്ണമറ്റ പുരസ്കാരങ്ങളാണ് ഇദ്ദേഹത്തെ തേടിയെത്തിയത്.

1997 ൽ പുറത്തിറങ്ങിയ മണിരത്നം ചിത്രം ഇരുവറിലെ അഭിനയത്തിനാണ് പ്രകാശ് രാജിന് ആദ്യ ദേശീയ പുരസ്കാരം ലഭിക്കുന്നത്. നടനവിസ്മയം മോഹൻലാലിനൊപ്പം മികച്ച പ്രകടനം കാഴ്ച വച്ച ആ ചിത്രത്തിന് മികച്ച സഹനടനുള്ള ദേശീയ പുരസ്കാരമാണ് പ്രകാശ് സ്വന്തമാക്കിയത്. പിന്നീട് തെലുങ്ക് ചിത്രം അനന്തപുരം, തമിഴ് ചിത്രങ്ങളായ ദയ, കാഞ്ചിവരം, കന്നഡ ചിത്രം പുത്തക്കന ഹൈവേ എന്നീ ചിത്രങ്ങളിലൂടെയും ദേശീയ പുരസ്കാരം അദ്ദേഹത്തെ തേടിയെത്തി.

തെലുങ്ക് ചലച്ചിത്ര മേഖലയിൽ വിലക്ക് നേരിടേണ്ടി വന്ന ആദ്യ താരമാണ് പ്രകാശ് രാജ്. സിദ്ധു എന്ന ചിത്രത്തിന്റെ ഷൂട്ടിംഗുമായി ബന്ധപ്പെട്ട ചില പ്രശ്നങ്ങളെ തുടർന്നാണ് നടനെ വിലക്കിയതെന്ന് റിപ്പോർട്ട്.

സാമൂഹിക പ്രവർത്തകൻ കൂടിയായ പ്രകാശ് രാജ്, തെലങ്കാനയിലെ മഹാബൂബ് നഗർ ജില്ലയിലെ കോണ്ടറെഡ്ഡിപള്ളെ, കർണാടകയിലെ ചിത്രദുർഗ ജില്ലയിലെ ബന്ദ്‌ലരഹട്ടി എന്നീ ഗ്രാമങ്ങൾ ദത്തെടുത്ത് സംരക്ഷിക്കുന്നുണ്ട്.