എട്ട് വെട്ടുമായി വി.ജാനകി; ഒടുവിൽ JSKയ്‌ക്ക് U/A സർട്ടിഫിക്കറ്റ്

വാർത്തകൾക്കും വിവാദങ്ങൾക്കുമൊടുവിൽ സുരേഷ് ഗോപി (Suresh Gopi) നായകനായ മലയാള ചിത്രം ജെ.എസ്.കെ. (JSK) എട്ടു മാറ്റങ്ങളോടെ തിയേറ്ററുകളിലേക്ക്. കഴിഞ്ഞ ദിവസം സമർപ്പിച്ച പുതുക്കിയ പതിപ്പിൽ എട്ട് മാറ്റങ്ങളുണ്ട്. ടൈറ്റിലിൽ 'ജാനകി വി' എന്ന് ചേർത്തായിരിക്കും തിയേറ്ററിൽ എത്തുക. ചിത്രം ഉടൻ തീയേറ്ററുകളിലെത്തുമെന്ന് അണിയറ പ്രവർത്തകർ അറിയിച്ചു. 'ജാനകി vs സ്റ്റേറ്റ് ഓഫ് കേരള'യിൽ സുരേഷ് ഗോപിയും അനുപമ പരമേശ്വരനും പ്രധാന വേഷങ്ങളിൽ അഭിനയിക്കുന്നു. ജൂൺ 20 ന് റിലീസ് ചെയ്യാനായിരുന്നു ആദ്യം തീരുമാനിച്ചിരുന്നത്. എന്നാൽ സെൻസർ തർക്കങ്ങൾ റിലീസ് വൈകിപ്പിച്ചു. സെൻസർ ബോർഡിന്റെ ആവശ്യങ്ങൾ 'ഏകപക്ഷീയവും' 'അനാവശ്യവും' എന്ന് വിശേഷിപ്പിച്ചുകൊണ്ട് സിനിമയുടെ നിർമ്മാതാക്കൾ നിരാശ പ്രകടിപ്പിച്ചിരുന്നു.