'ലോക' സിനിമയിലെ കന്നഡ വിരുദ്ധ പരാമർശത്തിൽ ഖേദം പ്രകടിപ്പിച്ച് നിർമാതാക്കളായ വേഫെറർ ഫിലിംസ്

ഞങ്ങളുടെ 'ലോക' എന്ന സിനിമയിലെ കഥാപാത്രങ്ങളിൽ ഒരാളുടെ ഒരു സംഭാഷണം കർണാടകയിലെ ആളുകളുടെ വികാരങ്ങളെ അവിചാരിതമായി വ്രണപ്പെടുത്തിയെന്നത് ശ്രദ്ധയിൽപ്പെട്ടിട്ടുണ്ട്. മറ്റെല്ലാത്തിനുമുപരിയായി മനുഷ്യർക്കാണ് വേഫെറര്‍ ഫിലിംസ് സ്ഥാനം നൽകുന്നത്. വീഴ്ചയിൽ അഗാധമായി ഖേദിക്കുന്നുവെന്നും ആരെയും വേദനിപ്പിക്കാൻ ഉദ്ദേശിച്ചിരന്നില്ലെന്നും സംഭാഷണം എത്രയും വേഗം നീക്കംചെയ്യുകയോ എഡിറ്റ് ചെയ്യുകയോ ചെയ്യുന്നതായിരിക്കുമെന്നും വേഫെറർ ഫിലിംസ് പ്രസ്താവനയിൽ പറഞ്ഞു.

പാര്‍ട്ടിയുടേയും മയക്കുമരുന്നിന്റേയും ഹബ്ബായി ബെംഗളൂരുവിനെ ചിത്രീകരിക്കുന്നു എന്നാരോപിച്ച് കന്നഡ സിനിമാ മേഖലയില്‍നിന്നുള്ളവര്‍ തന്നെ 'ലോക'യ്‌ക്കെതിരേ രംഗത്തുവന്നിരുന്നു. ബെംഗളൂരുവിലെ പെണ്‍കുട്ടികളെ അപമാനിക്കുന്നുവെന്നും ചിലര്‍ ചൂണ്ടിക്കാട്ടി. സംഭവം അന്വേഷിക്കുമെന്ന് ബെംഗളൂരു പോലീസ് കമ്മിഷണര്‍ സീമന്ത് കുമാര്‍ സിങ് അറിയിച്ചു.