ബീഹാറിൽ കനത്തമഴ; വെള്ളപ്പൊക്കം: മിന്നലേറ്റ് 11 പേർ മരിച്ചു; ആറുപേർക്ക് പരിക്ക്

പട്ന: കനത്ത മഴ തുടരുന്ന ബീഹാറിൽ മിന്നലേറ്റ് ഇതുവരെ മരിച്ചത് പതിനൊന്ന് പേർ. സംസ്ഥാനത്തിന്‍റെ വിവിധയിടങ്ങളിൽ നിന്നും റിപ്പോർട്ട് ചെയ്യപ്പെട്ട മിന്നൽ അപകടങ്ങളിൽ ആറ് പേർക്ക് പരിക്കേറ്റിട്ടുമുണ്ട്. കിഴക്ക്, പടിഞ്ഞാറ് ചമ്പാരൻ മേഖലയിൽ നിന്നാണ് മൂന്ന് മരണങ്ങൾ റിപ്പോർട്ട് ചെയ്തിരിക്കുന്നത്. പാട്നയിൽ രണ്ടും നളന്ദ, മധേപുര, ഔറംഗബാധ് എന്നിവിടങ്ങളിലായി ഓരോ മരണങ്ങളും റിപ്പോർട്ട് ചെയ്യപ്പെട്ടുവെന്നും സംസ്ഥാന ദുരന്ത നിവാരണ വകുപ്പാണ് അറിയിച്ചിരിക്കുന്നത്. കിഴക്കൻ ചമ്പാരൻ മേഖലയില്‍ നാല് പേർക്കാണ് മിന്നലിൽ ഗുരുതര പരിക്കേറ്റത്. പട്നയില്‍ രണ്ട് പേരും പരിക്കേറ്റ് ചികിത്സയിലാണ്.