'വനിതാ എംപിയെ അപമാനിച്ചു; എംപിമാരെ കയ്യേറ്റം ചെയ്തു; രാഹുൽ ഗാന്ധിക്കെതിരെ വധശ്രമത്തിനു പരാതി

ഇന്ന് പാർലമെന്‍റിലുണ്ടായ പ്രശ്നങ്ങൾക്കെല്ലാം കാരണം രാഹുലാണെന്നും പരാതിയിൽ ബിജെപി ആരോപിക്കുന്നു. സെക്ഷൻ 109, 115, 117, 121,125, 351 വകുപ്പുകൾ പ്രകാരമാണ് രാഹുൽ ഗാന്ധിക്കെതിരെ പാർലമെന്റ് സ്ട്രീറ്റ് പൊലീസ് സ്റ്റേഷനിൽ ബിജെപി പരാതി നൽകിയിരിക്കുന്നത്. ബിജെപി എംപിമാരായ അനുരാഗ് ഠാക്കൂറും ബൻസുരി സ്വരാജുമാണ് പരാതി നൽകിയത്.

രാഹുൽ അകാരണമായി തട്ടിക്കയറിയെന്ന് നാഗാലൻഡിൽ നിന്നുള്ള വനിതാ എം പി ഫാംഗ് നോൻ കൊന്യാക് പറഞ്ഞിരുന്നു. സ്ത്രീത്വത്തെ അപമാനിക്കുന്ന പെരുമാറ്റമായിരുന്നു രാഹുലിന്‍റേതെന്നും അവർ ആരോപിച്ചു. പ്രതിപക്ഷ നേതാവ് രാഹുൽ ഗാന്ധി ഗുണ്ടയെ പോലെ പെരുമാറിയെന്നും എംപിമാരെ കയ്യേറ്റം ചെയ്തെന്നും മന്ത്രി കിരൺ റിജിജുവും ആരോപിച്ചു. അതേസമയം രാഹുൽ ഗാന്ധിയെ അപമാനിക്കാനുള്ള നീക്കമാണ് നടക്കുന്നതെന്ന് പ്രിയങ്ക ഗാന്ധി പറഞ്ഞു.

ഇതിനിടെ കോണ്‍ഗ്രസ് അധ്യക്ഷൻ മല്ലികാർജുൻ ഖാർഗെയെ കയ്യേറ്റം ചെയ്തുവെന്ന് കാട്ടി കോൺഗ്രസ് ബിജെപി എംപിമാർക്കെതിരെ പാർലമെന്റ് സ്ട്രീറ്റ് പൊലീസ് സ്റ്റേഷനിൽ പരാതി നൽകിയിട്ടുണ്ട്.