ജമ്മു കാശ്മീരിൽ ഹിസ്ബുൾ മുജാഹിദീൻ കമാൻഡറെ വധിച്ചു; ദോഡ ജില്ലയെ 'ഭീകരമുക്ത'മായി പ്രഖ്യാപിച്ച് പൊലീസ്

മസൂദ് വധിക്കപ്പെട്ടതിനെ തുടർന്നാണ് ദോഡ ജില്ലയെ ഭീകരമുക്തമായി പ്രഖ്യാപിച്ചത്.. 'ദോഡയിൽ അവശേഷിച്ച ഏക തീവ്രവാദിയായിരുന്നു മസൂദ്. അയാൾ കൊല്ലപ്പെട്ടതോടെ ജില്ല വീണ്ടും ഭീകരമുക്തമായി എന്നായിരുന്നു ഡിജിപി ദിൽബാഗ് സിംഗ് അറിയിച്ചത്. ബലാത്സംഗക്കേസിൽ പ്രതിയായി ഒളിവിൽ പോയ മസൂദ് പിന്നീട് ഹിസ്ബുൾ മുജാഹിദീനിൽ അംഗമാവുകയും കശ്മീര്‍ പ്രവർത്തന മേഖലയാക്കുകയും ചെയ്തു എന്നാണ് പൊലീസ് പറയുന്നത്.

മേഖലയിൽ ഭീകരർ ഒളിച്ചിരിക്കുന്നുവെന്ന രഹസ്യവിവരത്തെ തുടർന്നാണ് പൊലീസും സേനയും സ്ഥലത്തെത്തിയത്. നാലുപാടു നിന്നും വളഞ്ഞ് നടത്തിയ ഓപ്പറേഷനിൽ രക്ഷപ്പെടാൻ മാർഗമില്ലാതായതോടെ ഭീകരര്‍ ഒളിസങ്കേതങ്ങളിൽ നിന്ന് വെടിയുതിർക്കുകയും ഏറ്റുമുട്ടലിൽ കലാശിക്കുകയുമായിരുന്നെന്നാണ് റിപ്പോർട്ട്.