വീട്ടമ്മമാർക്ക് 1000 രൂപ ശമ്പളം പ്രഖ്യാപിച്ച് MK സ്റ്റാലിൻ; വാഗ്ദാന പെരുമഴയുമായി DMK

സംസ്ഥാനത്തിന്റെ വികസനത്തിനായി പത്തു വർഷത്തെ കർമ പരിപാടിയുടെ രേഖയാണ് എം കെ സ്റ്റാലിൻ പുറത്തിറക്കിയത്.

'തമിഴ്നാട്ടിലെ എല്ലാ വനിതാ കുടുംബ മേധാവികൾക്കും എല്ലാമാസവും 1000 രൂപയുടെ ശരിയായ സഹായം ലഭ്യമാക്കുന്നു. പൊതു വിതരണ കേന്ദ്രങ്ങളിൽ നിന്ന് ഭക്ഷ്യവസ്തുക്കൾ വാങ്ങുന്ന എല്ലാ കുടുംബങ്ങൾക്കും ഇതിന്റെ ഗുണഫലങ്ങൾ ലഭിക്കും.' - എം കെ സ്റ്റാലിൻ പറഞ്ഞു. മക്കൾ നീതി മയ്യം നേതാവ് കമൽ ഹാസൻ തന്റെ പാർട്ടിയുടെ സാമ്പത്തിക അജണ്ടയുടെ ഭാഗമായി വീട്ടമ്മമാർക്ക് ശമ്പളം വാഗ്ദാനം ചെയ്ത് മൂന്നു മാസത്തിനു ശേഷമാണ് എം കെ സ്റ്റാലിന്റെ പ്രഖ്യാപനം.

പട്ടികജാതി, പട്ടികവർഗ, മറ്റ് പിന്നോക്ക സമുദായങ്ങൾക്കുള്ള വിദ്യാഭ്യാസ സ്കോളർഷിപ്പ് ഇരട്ടിയാക്കുമെന്ന് സ്റ്റാലിൻ വാഗ്ദാനം ചെയ്തു. തോട്ടിപ്പണി രംഗത്ത് മെഷിനറിയും സാങ്കേതികവിദ്യയും ഉപയോഗിക്കും. തമിഴ്‌നാടിന്റെ വളർച്ച ഉറപ്പാക്കുന്ന ഏഴു മേഖലകൾ സമ്പദ്‌വ്യവസ്ഥ, കൃഷി, ജല മാനേജ്മെന്റ്, വിദ്യാഭ്യാസവും ആരോഗ്യവും ശുചിത്വവും, നഗരവികസനം, ഗ്രാമീണ അടിസ്ഥാന സൗകര്യങ്ങൾ, സാമൂഹ്യനീതി എന്നിവയാണെന്ന് ദർശന രേഖ പ്രകാശനം ചെയ്തു കൊണ്ട് അദ്ദേഹം പറഞ്ഞു.

ഈ മേഖലകളിലെല്ലാം വികസനം വാഗ്ദാനം ചെയ്ത അദ്ദേഹം 'സ്റ്റാലിന്റെ ഏഴു വാഗ്ദാനങ്ങൾ' എന്ന് അത് പ്രഖ്യാപിക്കുകയും ജനങ്ങളിലേക്ക് എത്തിക്കാൻ പാർട്ടി കേഡർമാർക്ക് നിർദ്ദേശം നൽകുകയും ചെയ്തു. പ്രതിവർഷം പത്തു ലക്ഷം പുതിയ തൊഴിലവസരങ്ങൾ സൃഷ്ടിക്കുമെന്ന് അദ്ദേഹം ഉറപ്പു നൽകി. അധികാരത്തിൽ എത്തിയാൽ അടുത്ത പത്തു വർഷത്തിനുള്ളിൽ രണ്ട് അക്ക സാമ്പത്തിക വളർച്ച കൈവരിക്കുക എന്നതാണ് പാർട്ടിയുടെ ആദ്യ ലക്ഷ്യമെന്ന് അദ്ദേഹം പറഞ്ഞു. അടുത്ത പത്തു വർഷത്തിനുള്ളിൽ ഒരു കോടി ആളുകളെ ദാരിദ്ര്യത്തിൽ നിന്ന് ഉയർത്തിക്കൊണ്ടു വരുമെന്നും അദ്ദേഹം വ്യക്തമാക്കി. തമിഴ്‌നാട്ടിൽ ഇപ്പോൾ 10 ലക്ഷം ഹെക്ടറിലായി രണ്ട് വിളകൾ ഉത്പാദിപ്പിക്കുന്നുണ്ട്. അടുത്ത 10 വർഷത്തിനുള്ളിൽ ഇത് ഇരട്ടിയായി 20 ലക്ഷം ഹെക്ടറായി ഉയർത്തുമെന്നും അദ്ദേഹം പറഞ്ഞു.