കോൺ​ഗ്രസ് വാദങ്ങൾ തള്ളി ഹൈക്കോടതി; മോദിയുടെ അമ്മയുടെ എഐ വീഡിയോ സോഷ്യൽ മീഡിയയിൽ നിന്ന് നീക്കാൻ നിർദ്ദേശം

പട്ന: പ്രധാനമന്ത്രിയോടോ അദ്ദേഹത്തിന്റെ അമ്മയോടോ യാതൊരു അനാദരവും കാണിച്ചിട്ടില്ലെന്ന കോൺഗ്രസ് വാദങ്ങൾ തള്ളി ഹൈക്കോടതി. പ്രധാനമന്ത്രി നരേന്ദ്ര മോദിയുടെ അമ്മയുടെ പേരിൽ നിർമ്മിച്ച എഐ വീഡിയോ എല്ലാ സോഷ്യൽ മീഡിയ പ്ലാറ്റ്‌ഫോമുകളിൽ നിന്നും നീക്കം ചെയ്യാൻ കോൺഗ്രസ് പാർട്ടിയോട് പട്‌ന ഹൈക്കോടതി ബുധനാഴ്ച നിർദ്ദേശിച്ചു. ആക്ടിംഗ് ചീഫ് ജസ്റ്റിസ് പി.ബി. ബജന്താരിയുടെ നേതൃത്വത്തിലുള്ള ബെഞ്ചാണ് ഈ ഉത്തരവ് പുറപ്പെടുവിച്ചത്. ഈ വിഷയത്തിൽ കോൺഗ്രസ് നേതാവ് രാഹുൽ ഗാന്ധിക്കും സോഷ്യൽ മീഡിയ പ്ലാറ്റ്‌ഫോമുകളായ ഫേസ്ബുക്ക്, എക്‌സ്, ഗൂഗിൾ എന്നിവയ്ക്കും കോടതി നോട്ടീസ് അയച്ചിട്ടുണ്ട്.