80 ലക്ഷം രൂപ ചെലവിട്ട് നിർമ്മിച്ച പുതിയ കോവിഡ് വാർഡ് ചോർന്നൊലിക്കുന്ന നിലയിൽ; ദുരിതക്കയത്തിൽ രോഗികൾ

കെട്ടിടത്തിന്റെ മുകൾഭാഗത്തെ സീലിംഗിലൂടെയാണ് മഴവെള്ളം വാർഡിലേക്ക് പതിക്കുന്നത്. രോഗികളുടെ കിടക്കകളും മറ്റ് വസ്തുക്കളും നനയാതിരിക്കാൻ വാർഡിൽ ഉള്ളവർ പാടുപെടുന്നതും വീഡിയോയിൽ കാണാം. നിലത്ത് വീണ വെള്ളം തുടക്കാൻ ശ്രമിക്കുന്നവരും ദൃശ്യത്തിലുണ്ട്.

'കനത്ത മഴയെ തുടർന്ന് കെട്ടിടത്തിന്റെ സീലിംഗിന് മുകളിലൂടെ മഴവെള്ളം ഐ സി യു വാർഡിന്റ ഉള്ളിലേക്ക് പതിക്കുകയാണ്. തങ്ങളെ കേൾക്കാൻ ഇവിടെ ആരുമില്ല. രോഗികളായവർക്ക് മുകളിലേക്ക് വെള്ളം പതിക്കുന്ന സ്ഥിതിയാണ് നിലവിൽ ഉള്ളത്' - വീഡിയോ ചിത്രീകരിക്കുന്നതയാൾ പറയുന്നു.

വീഡിയോ ദൃശ്യം സോഷ്യൽ മീഡിയയിലൂടെ പങ്കുവെച്ച കോൺഗ്രസ് എം എൽ എ ബാപ്പു സിംഗ് തൽവാർ സംഭവത്തെ അപലപിച്ചു. 'പുതുതായി പണി കഴിപ്പിച്ച കോവിഡ് വാർഡാണിത്. ആദ്യമഴയിൽ തന്നെ ഇതിന്റെ അവസ്ഥ ഒന്ന് നോക്കൂ. ബഹുമാന്യ മുഖ്യമന്ത്രി ശിവരാജ് ജീ, അഴിമതി നടത്തിയുള്ള ഗുണ നിലവാരമില്ലാത്ത ഇത്തരം നിർമ്മാണ പ്രവർത്തനങ്ങളെ ഞാൻ അപലപിക്കുന്നു' - ബാപ്പു സിംഗ് ട്വിറ്ററിൽ കുറിച്ചു.

സംഭവത്തോട് പ്രതികരിച്ച രാജ്ഗഡിലെ ചീഫ് മെഡിക്കൽ ആൻഡ് ഹെൽത്ത് ഓഫീസർ ഡോക്ടർ എസ് യെദുവും അടുത്തിടെ മാത്രം നിർമ്മിച്ച വാർഡിലാണ് ചോർച്ച ഉണ്ടായത് എന്ന കാര്യം സ്ഥിരീകരിച്ചു. 70 മുതൽ 80 ലക്ഷം വരെ ചെലവഴിച്ചാണ് ഇതിന്റെ നിർമ്മാണം നടത്തിയത് എന്നും അദ്ദേഹം പറഞ്ഞു. വിശദാംശങ്ങൾ അറിയാൻ സംഭവ സ്ഥലത്തേക്ക് കീഴ് ഉദ്യോഗസ്ഥനെ പറഞ്ഞയച്ചിട്ടുണ്ടെന്നും കോവിഡ് രോഗികളുടെ സുരക്ഷയ്ക്ക് ആവശ്യമായ നടപടികൾ സ്വീകരിക്കും എന്നും മെഡിക്കൽ ഓഫീസർ വ്യക്തമാക്കി.

ഷെയർ ചെയ്യപ്പെട്ട വീഡിയോക്ക് താഴെ സർക്കാറിന്റെ അനാസ്ഥയാണിതെന്നും അഴിമതിക്കാർക്ക് എതിരെ ശക്തമായ നടപടി എടുക്കണം എന്നും ധാരാളം പേർ അഭിപ്രായപ്പെട്ടു. ടൗട്ടേ ചുഴലിക്കാറ്റിന്റെ പശ്ചാത്തലത്തിൽ മഹാരാഷ്ട്ര, ഗുജറാത്ത് സംസ്ഥാനങ്ങൾക്ക് പുറമേ മധ്യപ്രദേശിലും കഴിഞ്ഞ ഏതാനും ദിവസങ്ങളിലായി ശക്തമായ മഴയാണ് പെയ്യുന്നത്.

പ്രതിദിനം 6000ത്തോളം കോവിഡ് കേസുകളാണ് മധ്യപ്രദേശിൽ റിപ്പോർട്ട് ചെയ്യുന്നത്. തുടർച്ചയായ അഞ്ചു ആഴ്ച്ചകൾക്ക് ശേഷം തിങ്കളാഴ്ച്ച മാത്രമാണ് സംസ്ഥാനത്ത് പ്രതിദിന രോഗികളുടെ എണ്ണം 6000ത്തിന് താഴെ റിപ്പോർട്ട് ചെയ്തത്. 7,37,306 കോവിഡ് കേസുകളാണ് മധ്യപ്രദേശിൽ ഇതുവരെ റിപ്പോർട്ട് ചെയ്തിട്ടുള്ളത്. 7069 മരണങ്ങളും രേഖപ്പെടുത്തിയിട്ടുണ്ട്.

കഴിഞ്ഞ 24 മണിക്കൂറിനിടെ 11,513 പേർക്ക് കോവിഡ് മുക്തി സ്ഥിരീകരിച്ചിട്ടുണ്ട്. സർക്കാർ കണക്കുകൾ പ്രകാരം 88,983 ആക്ടീവ് കോവിഡ് കേസുകളാണ് സംസ്ഥാനത്ത് നിലവിൽ ഉള്ളത്. 6,41,254 പേർ ഇതുവരെ കോവിഡ് മുക്തരായി.