തെറ്റിന്റെ പേരിൽ ഒരു സമുദായത്തെ ഒറ്റപ്പെടുത്തരുതെന്ന് RSS അധ്യക്ഷൻ മോഹൻ ഭാഗവത്; രാജ്യവിരുദ്ധ ശക്തികൾക്കെതിരെ കരുതൽ വേണം

''ക്രമസമാധാന പാലനം നടത്തേണ്ടത് ഭരണസംവിധാനത്തിന്റെ ഉത്തരവാദിത്തമായിരുന്നു. ആരെങ്കിലും തെറ്റ് ചെയ്തിട്ടുണ്ടെങ്കിൽ അവരെ സമൂഹത്തിൽ നിന്ന് അകറ്റി നിർത്തരുത്. ദേഷ്യപ്പെടരുതെന്നും തെറ്റിദ്ധരിക്കപ്പെടരുതെന്നും സമുദായ നേതാക്കൾ ആളുകളോട് പറയണം, ”- സംഘപരിവാർ പ്രവർത്തകരെ ഓൺലൈൻ വഴി അഭിസംബോധന ചെയ്തുകൊണ്ട് ഭാഗവത് പറഞ്ഞു.

മഹാമാരി പടർന്നുപിടിക്കുന്ന ഈ സമയം പോലും രാജ്യത്തെ തകർക്കാനുള്ള അവസരമായി കാണുന്ന ദേശവിരുദ്ധ ശക്തികളുണ്ടെന്നും അദ്ദേഹം പറഞ്ഞു. മാർച്ച് മധ്യത്തിൽ നടന്ന ജമാഅത്ത് സമ്മേളനമാണ് രോഗവ്യാപനം വർധിപ്പിച്ചതെന്നുള്ള പ്രസ്താവനകളും വിദ്വേഷ പ്രസംഗങ്ങളും ഉയരുന്ന സാഹചര്യത്തിലാണ് മോഹൻ ഭാഗവതിന്റെ പ്രസ്താവന.

മുസ്ലിംവിഭാഗത്തെ ലക്ഷ്യമിട്ട് തെറ്റായ വാർത്തകളും വീഡിയോകളും പ്രചരിച്ചു. ഏപ്രിൽ ഒന്നിന് കൊറോണ ജിഹാദ് എന്ന വാക്ക് ട്വിറ്ററിൽ ട്രെൻഡിങ് ആയിരുന്നു. ഒരുവിഭാഗം ചെയ്ത കുറ്റത്തിന്റെ പേരിൽ മുഴുവൻ മുസ്ലിം സമുദായത്തെയും കുറ്റപ്പെടുത്തരുതെന്ന് ന്യൂനപക്ഷ ക്ഷേമകാര്യമന്ത്രി മുഖ്താർ അബ്ബാസ് നഖ്വി അടുത്തിടെ പറഞ്ഞിരുന്നു. ന്യൂനപക്ഷ സമുദായ അംഗങ്ങളിൽ ഭൂരിഭാഗവും ഈ ഒരു വിഭാഗത്തിന്റെ നടപടിയെ തള്ളിക്കളഞ്ഞ കാര്യവും അദ്ദേഹം ചൂണ്ടിക്കാട്ടിയിരുന്നു.