സ്റ്റീൽ പാത്രങ്ങൾ വാങ്ങിയതിൽ അഴിമതി; വി.എസ് ജയകുമാറിന്റെ പെൻഷൻ വെട്ടിക്കുറച്ച് ദേവസ്വം ബോർഡ്

ഫയലുകൾ‌ കൈകാര്യം ചെയ്തതു ക്രമവിരുദ്ധമായാണെന്നു ബോർഡിന്റെ വിജിലൻസ് കണ്ടെത്തി. തുടർന്ന് അവധിയിൽ പ്രവേശിച്ച ജയകുമാറിനെ പിന്നീട് സസ്പെൻഡ് ചെയ്തു. കേസ് വിജിലൻസ് അന്വേഷിക്കണമെന്നു 2018 മാർച്ചിൽ സർക്കാരിനു ശുപാർശ നൽകുകയും ചെയ്തു.

ബോർഡിന് 1,87,28,789 രൂപയുടെ നാശനഷ്ടം ഉണ്ടാക്കുക, വ്യാജ ബില്ലുകളിൽ തുക അനുവദിക്കുക, സ്റ്റോക് റജിസ്റ്റർ ഓഡിറ്റിനു നൽകാതെ മറച്ചുവയ്ക്കുക, ഫയൽ നശിപ്പിക്കുക തുടങ്ങി എട്ട് ആരോപണങ്ങളിൽ കുറ്റപത്രം നൽകിയെങ്കിലും ജയകുമാർ നിഷേധിച്ചു. തുടർന്ന് അന്വേഷണ കമ്മിഷനെ നിയോഗിച്ചു. ആരോപണങ്ങളിൽ അഞ്ചെണ്ണം പൂർണമായും ശരിയാണെന്നു കണ്ടെത്തി.  കുറ്റവിമുക്തനാക്കണമെന്ന് ആവശ്യപ്പെട്ടു ജയകുമാർ ബോർഡിനെ സമീപിച്ചു. രേഖാമൂലം നൽകിയ അപേക്ഷയും പറഞ്ഞ കാര്യങ്ങളും വിലയിരുത്തിയാണു പുതിയ തീരുമാനം.