നടിയെ ആക്രമിച്ച കേസ്; പ്രത്യേക പോക്സോ കോടതിയിൽ വിചാരണ ചെയ്യാനുള്ള മന്ത്രിസഭ തീരുമാനം റദ്ദാക്കി

തിരുവനന്തപുരം:കൊച്ചിയിൽ നടിയെ തട്ടിക്കൊണ്ടുപോയി ആക്രമിച്ച കേസിലെ വിചാര പ്രത്യേക പോക്സോ കോടതിയിൽ നടത്താനുള്ള മന്ത്രിസഭ തീരുമാനം റദ്ദാക്കി. ഈ കേസ് സിബിഐ കോടതിയിലെ വനിത ജഡ്ജി വിചാരണ ചെയ്യണമെന്ന് കഴിഞ്ഞ ഫെബ്രുവരിയിൽ ഹൈക്കോടതി വിധിച്ചിരുന്നു. ഇത് ശ്രദ്ധിക്കാതെയാണ് ബുധനാഴ്ച ചേർന്ന മന്ത്രിസഭ യോഗത്തിൽ കേസിൻറെ വിചാരണ പ്രത്യേക കോടതിയിൽ നടത്താന്‍ തീരുമാനിച്ചത്.

also read: മുഖ്യമന്ത്രിക്കെതിരെ ഫേസ്ബുക്ക് പോസ്റ്റ്: സർക്കാർ ഉദ്യോഗസ്ഥന് സസ്പെൻഷൻ

എന്നാൽ ചട്ടലംഘനം ശ്രദ്ധയിൽപ്പെട്ടതിനെ തുടർന്ന് മുഖ്യമന്ത്രി തീരുമാനം റദ്ദാക്കുകയായിരുന്നു. പുതിയ കോടതി സ്ഥാപിക്കാനുള്ള തീരുമാനം മാത്രം ഉത്തരവായി ഇറക്കാൻ മുഖ്യമന്ത്രി നിർദേശിച്ചു. അടുത്ത മന്ത്രിസഭ യോഗം ഈ തീരുമാനം അംഗീകരിച്ചാൽ മതിയാകും.

നെടുമ്പാശേരിയിൽ പോക്സോ കേസുകൾക്ക് മാത്രമായി പ്രത്യേക കോടതി സ്ഥാപിക്കാനായിരുന്നു മന്ത്രിസഭ യോഗത്തിലെ തീരുമാനം. നടിയെ ആക്രമിച്ച കേസ് ഇവിടെ വിചാരണ ചെയ്യുമെന്ന് ഇതിൽ ചേർത്തിരുന്നു.