80ലധികം ബസുകളിലായി 3000ത്തിലധികം വയോജനങ്ങൾ വയനാട്ടിലേക്ക്; വിനോദയാത്രക്ക് മലപ്പുറത്ത് നിന്നും തുടക്കം

യാത്രയിലെ ഭക്ഷണം അടക്കമുള്ള ചെലവുകൾ എല്ലാം നഗരസഭ വഹിക്കും. നഗരസഭാ ഫണ്ടിൽ നിന്നും 40 ലക്ഷം രൂപയാണ് ഇതിനായി വകയിരിത്തിയിരിക്കുന്നത്. വയോജനങ്ങളോടുള്ള നഗരസഭയുടെ സ്നേഹത്തിൻ്റെയും കടപ്പാടിന്റെയും പ്രതീകമാണ് ഈ യാത്രയെന്ന് മലപ്പുറം നഗരസഭാ ചെയർമാൻ മുജീബ് കാടേരി പറഞ്ഞു.

യാത്രയുടെ ഭാഗമാകാൻ എത്തിയവർക്കും പങ്കുവെക്കാനുള്ളത് സന്തോഷം തന്നെയാണ്.

യാത്രയിൽ മൂന്ന് ആംബുലൻസുകളിലായി ഓരോ വില്ലേജിനും ഡോക്ടർ, ഫാർമസിസ്റ്റ്, നഴ്സുമാർ ഉൾപ്പെടെയുള്ള മെഡിക്കൽ സംഘവും ഇവർക്കൊപ്പമുണ്ട്. യാത്രയ്ക്ക് ഉപയോഗിക്കുന്ന വാഹനങ്ങളിൽ ഏതെങ്കിലും തരത്തിലുള്ള കേടുപാടുകൾ സംഭവിക്കുന്ന പക്ഷം മുടക്കം വരാതിരിക്കാൻ താമരശ്ശേരി, കൽപ്പറ്റ എന്നീ പ്രദേശങ്ങളിൽ അത്യാവശ്യ ഘട്ടങ്ങളിൽ ഉപയോഗിക്കാനുള്ള ബസുകൾ വരെ ഒരുക്കിയാണ് യാത്ര. പൂക്കോട് തടാകം, കാരാപ്പുഴ ഡാം എന്നിവിടങ്ങൾ സംഘം സന്ദർശിക്കും. യാത്രികർക്ക് മലപ്പുറം നഗരസഭ വർണ്ണക്കുടയും സമ്മാനമായി നൽകി.