എന്നെ കടിക്കാൻ പറ്റില്ലെടാ പട്ടീ; അഞ്ചു വയസുകാരൻ തെരുവുനായ്ക്കളിൽ നിന്നും സാഹസികമായി ഓടി രക്ഷപെട്ടു

സൈക്കിളിംഗ് നടത്തിക്കൊണ്ടിരുന്ന അഞ്ചു വയസ്സുകാരന് നേരെ തെരുവുനായ്ക്കൾ ഓടിയടുത്തതോടെ, കുട്ടി അതിവേഗത്തിൽ ഓടി അടുത്തുള്ള വീട്ടിൽക്കയറി രക്ഷപ്പെടുകയായിരുന്നു.

വാഹനങ്ങളിൽ പോകുന്നവർ ഡീസന്റ്മുക്കിലുള്ള കുറ്റിക്കാടുകളിൽ ഇറച്ചി മാലിന്യങ്ങൾ ഉപേക്ഷിക്കുന്നതാവാം ആ ഭാഗത്ത് തെരുവ് നായ്ക്കളുടെ ശല്യം രൂക്ഷമാകാൻ കാരണമെന്ന് പ്രദേശവാസികൾ പറയുന്നു.

ഇരുപതിലധികം തെരുവുനായ്ക്കൾ റോഡരുകിലും സമീപത്തെ കുറ്റിക്കാടുകളിലും എപ്പോഴും കാണുമെന്നും, വാഹനങ്ങളിൽ പോകുന്നവരെയും കാൽനടയാത്രക്കാരെയും ആക്രമണ സ്വഭാവമുള്ള ഈ തെരുവുനായ്ക്കൾ ആക്രമിക്കാറുണ്ടെന്നും, നിത്യേന അപകടം സംഭവിക്കാറുണ്ടെന്നും, ഇടവ ഗ്രാമപഞ്ചായത്തിൽ പരാതി നൽകിയിട്ടും ഒരു ഫലവും ഉണ്ടായില്ല എന്നും പ്രദേശവാസികൾ പറയുന്നു.

ഔദ്യോഗിക കണക്കുകൾ പ്രകാരം, തെരുവുനായ ശല്യം ഒഴിവാക്കാൻ കഴിഞ്ഞ രണ്ട് വർഷത്തിനിടെ തദ്ദേശ സ്വയംഭരണ സ്ഥാപനങ്ങൾ ആകെ അനുവദിച്ച 98.93 കോടി രൂപയിൽ 13.59 കോടി രൂപ മാത്രമാണ് ചെലവഴിച്ചത്. ഈ വർഷം തുടങ്ങിയതില്പിന്നെ, ആദ്യ അഞ്ച് മാസത്തിനിടെ കേരളത്തിൽ 1.65 ലക്ഷത്തിലധികം ആളുകൾക്ക് തെരുവ് നായ്ക്കളുടെ കടിയേറ്റു, ഇതിൽ 17 പേർ മരിച്ചു.