199 ദിവസം പാഴായെന്ന് വിലയിരുത്തൽ: ഒന്നാം തീയതിയിലെ മദ്യനിരോധനം ഒഴിവാക്കാൻ സർക്കാർ ആലോചന

പൊതുവിൽ അനുകൂല അഭിപ്രായാണ് സെക്രട്ടേറിയറ്റിൽ ഉണ്ടായത്. എന്നാൽ ഇതുമായി ബന്ധപ്പെട്ട് ചില ആശങ്കകളും സിപിഎം നേതാക്കൾ ചൂണ്ടിക്കാട്ടി.  ഈ വർഷം ഒക്ടബോറിൽ തദ്ദേശ തെരഞ്ഞടുപ്പ് നടക്കും. ആറുമാസങ്ങൾക്കുശേഷം നിയമസഭാ തെരഞ്ഞെടുപ്പും. തെരഞ്ഞെടുപ്പ് വർഷം ഇത്തരമൊരു തീരുമാനമെടുക്കുന്നത് രാഷ്ട്രീയമായി തിരിച്ചടിയാകുമോ എന്നാണ് ആശങ്ക. ക്രൈസ്തവ സംഘടനകളും സംസ്ഥാനത്തെ മദ്യവർജന സംഘടനകളും സംഘടനകളും ഈ സർക്കാരിന്റെ മദ്യ നയത്തെ ആദ്യഘട്ടം മുതൽ എതിർത്തിരുന്നു. ഡ്രൈ ഡേ ഒഴിവാക്കാൻ സർക്കാർ തീരുമാനിച്ചാൽ തെരഞ്ഞെടുപ്പുകളിൽ അതു തിരിച്ചടിയായേക്കും. അതാണ് അടിയന്തിര തീരുമാനത്തിൽ നിന്ന് സർക്കാരിനെ പിന്നോട്ടു വലിക്കുന്നത്.

ഇടതുമുന്നണിയും വൈകാതെ വിഷയം ചർച്ച ചെയ്യും. മദ്യനയത്തിൽ മാറ്റം വരുത്താനും ഡ്രൈ ഡേ പിൻവലിക്കാനും തീരുമാനിച്ചിട്ടില്ലെന്ന് എക്സൈസ് മന്ത്രി ടി.പി.രാമകൃഷ്ണൻ പറഞ്ഞു.  ഇപ്പോഴത്തെ മദ്യനയം തുടരും. ഏപ്രിലിൽ പുതിയ മദ്യനയം വരുമെന്നും ഡ്രൈ ഡേയുടെ കാര്യത്തിൽ തീരുമാനമായിട്ടില്ലെന്നും മന്ത്രി വ്യക്തമാക്കി.

ചാരായ നിരോധനത്തിനു ശേഷം എ കെ ആന്റണിക്ക് കൈയടിയും വീട്ടമ്മമാരുടെ വലിയ പിന്തുണയും ഉറപ്പാക്കിയ നടപടി ആയിരുന്നു ഡ്രൈ ഡേ പ്രഖ്യാപനം. അതുകൊണ്ടു തന്നെയാണ് ഇതുവരെയും അതു പിൻവലിക്കാൻ ഒരു സർക്കാരും ധൈര്യം കാട്ടാതിരുന്നത്.  ഒന്നാം തീയതി ലഭിക്കുന്ന ശമ്പളം അതേപടി മദ്യശാലകളിലേക്കു പോകുന്നു എന്ന വിലയിരുത്തലാണ് അന്നത്തെ സർക്കാരിനുണ്ടായിരുന്നത്. ഇപ്പോൾ കാര്യങ്ങൾ മാറിയെന്ന് ഇടതുസർക്കാർ കരുതുന്നു. പലർക്കും ശമ്പളം മാസത്തെ അവസാന ദിവസം ലഭിക്കുന്ന സാഹചര്യമുണ്ട്. അല്ലെങ്കിലും മദ്യപാനികൾ ഏറിയ പങ്കും 31നു തന്നെ മദ്യ വാങ്ങി സ്റ്റോക്ക് ചെയ്യാറുണ്ട്. അതുകൊണ്ടുതന്നെ ഡ്രൈ ഡേയുടെ പ്രസ്ക്തി ഇല്ലാതായെന്നും സർക്കാർ കരുതുന്നു.