ക്ഷേത്രങ്ങളിലെ വിപ്ലവഗാനത്തിൽ സർക്കാരിനും ദേവസ്വം ബോർഡുകൾക്കും ഹൈക്കോടതി നോട്ടീസ്

കൊച്ചി: ക്ഷേത്രപരിസരങ്ങൾ രാഷ്ട്രീയ കക്ഷികളുടെ പ്രചാരണത്തിന് ഉപയോഗിക്കരുതെന്ന നിയമം കർശനമായി നടപ്പാക്കണമെന്ന് ഹൈക്കോടതി. ഇക്കാര്യം ചൂണ്ടിക്കാട്ടി സർക്കാരിനും ദേവസ്വം ബോർഡുകൾക്കും ഹൈക്കോടതി നോട്ടീസ് അയച്ചു. ദേവസ്വം ബോർഡുകളുടെ നിയന്ത്രണത്തിലല്ലാത്ത ക്ഷേത്രങ്ങൾക്കും മതസ്ഥാപന ദുരുപയോഗം തടയൽ നിയമം ബാധകമാക്കണമെന്ന കൊച്ചി സ്വദേശി എൻ പ്രകാശ് സമർപ്പിച്ച ഹർജിയിലാണ് നടപടി. വിഷയത്തിൽ മൂന്നാഴ്ചയ്കകം മറുപടി നൽകാൻ ജസ്റ്റിസ് അനിൽ കെ നരേന്ദ്രൻ, ജസ്റ്റിസ് എസ് മുരളികൃഷ്ണ എന്നിവരുൾപ്പെട്ട ദേവസ്വം ബെഞ്ച് നിർ‌ദേശിച്ചു.