വിദ്യാർഥികളിൽ ഗവേഷണ ചിന്ത വളർത്താൻ 'സ്ട്രീം എക്കോസിസ്റ്റം' പദ്ധതി

ചെങ്ങമനാട് ഗവ: ഹയർ സെക്കൻഡറി സ്കൂളിൽ 'സ്ട്രീം എക്കോസിസ്റ്റം' (സ്ട്രീം ലാബ്) പ്രവർത്തനം ആരംഭിച്ചു. വിദ്യാർഥികളിൽ ഗവേഷണ താല്പര്യവും ഇന്നവേഷൻ മനോഭാവവും, ജീവിത നൈപുണികളും വളർത്തിയെടുക്കുക എന്ന ലക്ഷ്യത്തോടെയാണ് 'സ്ട്രീം എക്കോസിസ്റ്റം' (സ്ട്രീം ലാബ്) പ്രവർത്തനം ആരംഭിച്ചത്. അസി. ജില്ല കളക്‌ടർ പാർവ്വതി ഗോപകുമാർ ഉദ്ഘാടനം ചെയ്തു. ആധുനിക സംവിധാനങ്ങളോടെ ഇലക്ട്രോണിക്സ‌്, സയൻസ്, ക്രാഫ്റ്റ് ആൻഡ് ടൂൾസ്, ഡിജിറ്റൽ ഫാബ്രിക്കേഷൻ, മീഡിയ ലാബുകൾക്കാണ് തുടക്കം കുറിച്ചത്. സാമൂഹിക പ്രശ്‌നങ്ങൾ തിരിച്ചറിയാനും, അവയെ ഗവേഷണാത്മകമാക്കുന്നതിനും സഹായകമാകുന്ന വിധത്തിലാണ് പദ്ധതി രൂപകൽപ്പന ചെയ്തിട്ടുള്ളത്. എസ്.എസ്.കെയുടേയും (സമഗ്ര ശിക്ഷാ കേരളം), ശാസ്ത്ര സാങ്കേതിക സർവ്വകലാശാലയുടെയും സഹായത്തോടെ, കേരളത്തിലെ പൊതുവിദ്യാലയങ്ങളിൽ നടപ്പാക്കുന്ന പദ്ധതി നിലവിലെ സ്കൂൾ പാഠ്യപദ്ധതിയെ പിന്തുണക്കുന്നതുമാണ്.